অ’মিক্ৰণ আতংক: পলম হ’ব ভাৰতীয় ক্ৰিকেট দলৰ দক্ষিণ আফ্ৰিকা ভ্ৰমণ

ক’ভিদৰ নতুন প্ৰজাতিৰ সংক্ৰমণ দক্ষিণ আফ্ৰিকাত বিয়পি পৰাৰ পিছতে ভাৰতীয় ক্ৰিকেট দলৰ দক্ষিণ আফ্ৰিকা ভ্ৰমণ অনিশ্চয়তাৰ মাজত সোমাই পৰিছে।

জানিব পৰা অনুসৰি ভাৰতীয় ক্ৰিকেট নিয়ন্ত্ৰণ ব’ৰ্ডে ক্ৰিকেট দক্ষিণ আফ্ৰিকাৰ সৈতে দ্বিপাক্ষিক ক্ৰিকেট সূচীৰ স্থগিত ৰখাৰ বাবে আলোচনা কৰি আছে।

বৰ্তমান নিউজিলেণ্ডৰ সৈতে ঘৰুৱা টেষ্ট শৃংখলাত ব্যস্ত থকা ভাৰতীয় দলে ৯ ডিচেম্বৰত দক্ষিণ আফ্ৰিকালৈ উৰা মাৰিব বুলি সময়সূচী প্ৰকাশ কৰিছিল। সূত্ৰ অনুসৰি সেই সূচী বৰ্তমান স্থগিত ৰখা হৈছে।

দক্ষিণ আফ্ৰিকা ভ্ৰমণৰ বাবে ভাৰতীয় দল নিৰ্বাচনো পিছুৱাই দিয়া হৈছে। নিউজিলেণ্ডৰ বিৰুদ্ধে ভাৰতৰ প্ৰথম খন টেষ্টৰ পিছতে বাছনি বৈঠক অনুষ্ঠিত হোৱাৰ কথা আছিল।

কিন্তু ভাৰতীয় বোৰ্ডে ইয়াৰ দক্ষিণ আফ্ৰিকাৰ ক্ৰিকেট ব’ৰ্ডৰ সৈতে আলোচনাৰ অন্তত আগন্তুক ভ্ৰমণ সম্পৰ্কত সিদ্ধান্ত লোৱাৰ পিছতহে বাছনি বৈঠক অনুষ্ঠিত কৰাৰ সিদ্ধান্ত লোৱা হৈছে।

উল্লেখ্য যে ভাৰতীয় দলে দক্ষিণ আফ্ৰিকাত তিনিখন টেষ্ট, তিনিখন এদিনীয়া আৰু চাৰিখন টি-২০ ৰ শৃংখলাত ভাগ ল’ব।