জৰুৰী কালীন ব্যৱহাৰৰ বাবে WHO ৰ অনুমোদন পালে কভোভাক্সে

চিৰাম ইনষ্টিটিউট অৱ ইণ্ডিয়াৰ (SII) মুখ্য কাৰ্যবাহী বিষয়া আদাৰ পুনাৱালাই জানিবলৈ দিয়ে যে শিশুৰ ক্ষেত্ৰত কভোভাক্স ভেকছিনৰ জৰুৰী কালীন ব্যৱহাৰৰ বাবে বিশ্ব স্বাস্থ্য সংস্থাৰ অনুমোদন লাভ কৰিছে।

WHO অনুমোদনক ক’ভিদ-১৯ ৰ বিৰুদ্ধে যুঁজত আন এটা মাইলৰ খুঁটি হিচাপে প্ৰশংসা কৰে আদাৰ পুনাৱালাই।

বিশ্ব স্বাস্থ্য সংস্থাই শুকুৰবাৰে নিম্ন আয়ৰ দেশবোৰত টিকাকৰণৰ পৰিসৰ বৃদ্ধি কৰাৰ লক্ষ্যৰে জৰুৰীকালীন ব্যৱহাৰৰ বাবে কভোভাক্সক নৱম ক’ভিদ-১৯ ভেকচিন হিচাপে তালিকাভুক্ত কৰে।

উল্লেখ্য যে কভোভাক্স ভাৰতীয় চিৰাম ইনষ্টিটিউটৰ দ্বাৰা নভাভেক্সৰ অনুজ্ঞাপত্ৰৰ অধীনত প্ৰস্তুত কৰা হৈছে।

পুনাৱালাই টুইট যোগে WHOৰ অনুমোদনৰ কথা ঘোষণা কৰি কয়, “ক’ভিদ-১৯ ৰ বিৰুদ্ধে আমাৰ যুঁজত এয়া আন এক মাইলৰ খুঁটি,।কভোভাক্স এতিয়া বিশ্ব স্বাস্থ্য সংস্থাই জৰুৰীকালীন ব্যৱহাৰৰ বাবে অনুমোদন জনাইছে। ই উৎকৃষ্ট সুৰক্ষা আৰু কাৰ্যকাৰীতা প্ৰদৰ্শন কৰিছে। এক মহান সহযোগিতাৰ বাবে আপোনালোক সকলোকে ধন্যবাদ।”

টুইটটোত তেওঁ নভাভাক্স, বিশ্ব স্বাস্থ্য সংস্থা, গাভি ভেকছিন এলায়েন্স, ইয়াৰ মুখ্য কাৰ্যবাহী বিষয়া ছেথ বাৰ্কলি আৰু গেটছ ফাউণ্ডেচনক টেগ কৰিছিল।

এই সপ্তাহৰ আৰম্ভণিতে পুনাৱালাই কৈছিল যে SII — এ অহা ছয় মাহৰ ভিতৰত শিশুৰ বাবে ক’ভিদ-19 ভেকচিন কভোভাক্স মুকলি কৰাৰ পৰিকল্পনা কৰিছে।

তেওঁ কৈছিল যে পৰীক্ষণৰ অধীনত থকা কভোভাক্সে শিশুসকলক তিনি বছৰলৈকে সুৰক্ষা প্ৰদান কৰিব কিয়নো ই পৰীক্ষণৰ সময়ত উৎকৃষ্ট তথ্য দেখুৱাইছে।

বৰ্তমানে দেশত ১৮ বছৰৰ অধিক বয়সৰ লোকৰ বাবে কভিশ্বিল্ড আৰু ক’ভাক্সিন ক’ভিদ-19 ভেকচিন অনুমোদিত।