অভয়াপুৰীত ‘বৃন্দাৱনী বস্ত্ৰ কথা’ আৰু ‘অনুগল্পৰ ৰহঘৰা’ উন্মোচন

বঙাইগাঁও জিলা সাহিত্য সভাৰ উদ্যোগত আৰু অভয়াপুৰী স্বৰ্ণ শাখা সাহিত্য সভাৰ সহযোগত অভয়াপুৰীৰ সাহিত্য ভৱনত অসম সাহিত্য সভাৰ ১০৫ সংখ্যক প্ৰতিষ্ঠা দিৱস উদযাপন কৰা হয় ৷

অভয়াপুৰী স্বৰ্ণ শাখা সাহিত্য সভাৰ সভাপতি মৃদুল কুমাৰ দাসে পুৱা অসম সাহিত্য সভাৰ পতাকা উত্তোলনেৰে কাৰ্যসূচীৰ শুভাৰম্ভ কৰে ৷

ইয়াৰ পিছতে সাহিত্যৰথী লক্ষ্মীনাথ বেজবৰুৱাৰ আৱক্ষ মূৰ্তিৰ সন্মুখত বন্তি প্ৰজ্বলন কৰে শাখাৰ কাৰ্যবাহী সদস্য নৱ কুমাৰ দাসে ৷ প্ৰতিষ্ঠা দিৱসৰ লগত সংগতি ৰাখি দুখন গ্ৰন্থ উন্মোচন কৰা হয় ৷ অৱসৰপ্ৰাপ্ত প্ৰশাসনিক বিষয়া ৰোহিনী কুমাৰ চৌধুৰীৰ ‘বৃন্দাৱনী বস্ত্ৰ কথা ‘ আৰু শকুন্তলা চৌধুৰীৰ ‘অনুগল্পৰ ৰহঘৰা’ ৷

গ্ৰন্থ দুখন উন্মোচন কৰে শৰ্মাৰাম দাস আৰু ৰমলা ৰায় সৰকাৰে ৷ উন্মোচকৰ দুআষাৰত শৰ্মাৰাম দাসে বৃন্দাৱনী বস্ত্ৰৰ আতি গুৰি বিৱৰি কয় ৷

আনহাতে অনুগল্পৰ ৰহঘৰা গ্ৰন্থখন উন্মোচন কৰি ৰমলা ৰায় সৰকাৰে বঙাইগাঁও অঞ্চলত মহিলা সাহিত্যকৰ্মীৰ চমকপ্ৰদ উত্থান হোৱা বাবে সন্তুষ্টি প্ৰকাশ কৰে ৷

পুৱা এঘাৰ বজাৰ পৰা আৰম্ভ হোৱা সভাখনত সভাপতিত্ব কৰে বঙাইগাঁও জিলা সাহিত্য সভাৰ সভানেত্ৰী ৰমলা ৰায় সৰকাৰে ৷ জিলা শাখাৰ সম্পাদক বিনোদ কুমাৰ বৰ্মনে উদ্দেশ্য ব্যাখ্যা কৰা সভাত বিশিষ্ট শিক্ষক তথা সাহিত্যকৰ্মী সতীশ চন্দ্ৰ দাসে নিজৰ চমু বক্তব্যত কয় যে সাহিত্য হ’ল সমাজৰ ছবি ৷

গতিকে লেখকসকলে আমাৰ চৌপাশৰ ঘটনাৰাজিক সাহিত্যত স্থান দিব লাগে ৷

সভাত মীনা শৰ্মাই এটি জ্যোতি সংগীত পৰিৱেশন কৰি সকলোকে আপ্লুত কৰে ৷

সেইদৰে নৱ প্ৰজন্মৰ প্ৰতিভাশালী কবি তনুপ্ৰিয়া কলিতাই স্বৰচিত কবিতা ‘বিন্দুকণা’, বুলুমণি দাস কলিতাই এটি অনুগল্প, স্বভাৱকবি যোগেন ৰাজবংশীয়ে ডঃ ভূপেন হাজৰিকাৰ মৃত্যুত লিখা এটি কবিতা আবৃত্তি কৰে৷ সভাখনত ডাঃ নুৰুল ইছলাম, কামখ্যা প্ৰসাদ ৰায়, অনুকূল চন্দ্ৰ নাথ, মমতা চৌধুৰী, দিপুল কুমাৰ ৰায়, অৰবিন্দ অধিকাৰী, অংকিতা চৌধুৰী, বিক্ৰম চৌধুৰী আদি উপস্থিত থাকে ৷ শেষত অভয়াপুৰী স্বৰ্ণ শাখা সাহিত্য সভাৰ সম্পাদক অংকুৰ দাসে শলাগৰ শৰাই আগবঢ়ায় ৷