টীয়কৰ এটি চৰকাৰী কাৰ্যালয়ৰ ব্যতিক্ৰমী পৰিবেশ হৈ পৰিছে সকলোৰে আকৰ্ষণৰ কেন্দ্ৰ

এটা চৰকাৰী কাৰ্যালয়ৰ মনোমোহা পৰিৱেশে আপোনাকো আকৰ্ষিত কৰিব। এক আশ্ৰম সদৃশ পৰিৱেশ। কাৰ্যালয়টোলৈ যদি সোমাই আহে চৌহদৰ সেউজীয়াই আপোনাক আদৰণি জনোৱাৰ লগতে চৌহদৰ প্ৰতিজোপা গছত সংস্থাপিত কৰা অৰ্কিডে আপোনাক হাত বাউলি মাতিব।

কি নাই এই চৰকাৰী কাৰ্যালয়টোৰ চৌহদত? চৌহদত আছে প্ৰায় চাৰি বিঘা মাটিত চাহ গছ। তাৰ মাজে মাজে আছে প্ৰায় শতাধিক সাঁচি গছ, আম, জলফাই, মধুৰীআম ,কঠাল, কৰ্দৈ, পান-তামোলৰ গছ আদি। আৰু প্ৰায় প্ৰতিজোপা গছত সংস্থাপন কৰা হৈছে বিভিন্ন প্ৰজাতিৰ অৰ্কিড। 

কেৱল এয়াই নহয় চৰকাৰী কাৰ্যালয়টোৰ চৌহদত আছে বিশুদ্ধ খোৱা পানীৰ এক প্ৰকল্প। যি প্ৰকল্পৰ পৰা স্থানীয় ৰাইজে উৎসৱ-পাৰ্বনে সুলভ মূল্যত লাভ কৰিব পাৰে বিশুদ্ধ খোৱা পানী।

তেনেদৰে চৰকাৰী কাৰ্যালয়টোৰ চৌহদত আছে মৎস্য পালনৰ বাবে এটা পুখুৰীও। চৰকাৰী কাৰ্যালয়টোৰ বাবে প্ৰয়োজনীয় অন্যান্য খৰচ আদি যাতে এই সমূহৰ পৰা আহৰণ কৰিব পাৰি তাৰ বাবে এই ব্যতিক্ৰমী প্ৰয়াস।

পৰিস্কাৰ পৰিচন্নতাৰে ৰখা ব্যতিক্ৰমী এই চৰকাৰী কাৰ্যালয়টো হ’ল যোৰহাট জিলাৰ টীয়কৰ মধ্য হোলোঙাপাৰ গাঁও পঞ্চায়ত কাৰ্যালয়। যিটো চৰকাৰী কাৰ্যালয় এতিয়া সকলোৰে চৰ্চাৰ কেন্দ্ৰ হৈ পৰিছে।