জেকুলিনৰ সৈতে আছিল প্ৰেমৰ সম্পৰ্ক; দাবী প্ৰতাৰণাৰ গোচৰত অভিযুক্ত সুকেশৰ

বলীউদৰ মোহময়ী অভিনেত্ৰী জেকুলিন ফাৰ্ণাণ্ডেজৰ সৈতে ২০০কোটি টকাৰ প্ৰতাৰণাৰ গোচৰত অভিযুক্ত সুকেশ চন্দ্ৰশেখৰৰ প্ৰেমৰ সম্পৰ্ক আছিল। নিজৰ অধিবক্তাৰ জৰিয়তে এই দাবী সুকেশৰ।

সুন্দৰী অভিনেত্ৰীগৰাকী সুকেশৰ জালত বন্দী হোৱা বুলি জানিব পৰা গৈছিল যদিও শেহতীয়াকৈ এখন পত্ৰৰ জৰিয়তে সুকেশে সদৰী কৰিছে যে তেওঁৰ বিৰুদ্ধে অনা এই অভিযোগ সম্পূৰ্ণ মিছা।

সুকেশে কাৰাগাৰৰ ভিতৰত লিখা এখন পত্ৰৰ কথা তেওঁৰ অধিবক্তা অনন্ত মালিকে সংবাদ মাধ্যমক অৱগত কৰিছে।

ইয়াত সুকেশে দাবী কৰিছে যে তেওঁৰ জেকুলিনৰ সৈতে সম্পৰ্ক আছিল। তেওঁক প্ৰতাৰক হিচাপে চিনাক্ত কৰা উচিত নহয় বুলিও দাবী কৰে সুকেশে। তেওঁ কয় যে তেওঁ এতিয়াও অভিযুক্তহে, দোষী সাৱ্যস্ত হোৱা নাই।

Also Read: নৱবৰ্ষৰ প্ৰথম দিনটোতে বিবাহপাশত আৱদ্ধ হ’ল ‘দেৱো কা দেৱ-মহাদেৱ’ খ্যাত অভিনেতা মোহিত

সুকেশৰ দাবী যে তেওঁৰ প্ৰেমৰ সম্পৰ্কৰ লগত তেওঁৰ বিৰুদ্ধে উত্থাপিত অভিযোগৰ কোনো সম্পৰ্ক নাই। জেকুলিনে ঘটনাৰ পাছতে তেওঁলোকৰ প্ৰেমৰ সম্পৰ্কৰ কথা অস্বীকাৰ কৰিছিল।

এটা দৰৱ প্ৰস্তুতকাৰী সংস্থাৰ প্ৰাক্তন স্বত্ত্বাধিকাৰী শিবেন্দ্ৰ সিং আৰু মালবেন্দ্ৰ সিঙৰ পৰিয়ালৰ সৈতে সুকেশ আৰু তেওঁৰ পত্নী লীনা পলৰ ২০০কোটি টকাৰ প্ৰতাৰণাৰ অভিযোগ উঠিছে। উক্ত গোচৰত দুয়োকে গ্ৰেপ্তাৰ কৰা হয়। তাৰ পাছতে এই ঘটনাৰ সৈতে জড়িত হৈ পৰে জেকুলিন ফাৰ্ণাণ্ডজ।

এই গোচৰটোৰ সৈতে জেকুলিনৰ নাম ভালদৰেই জড়িত হৈ পৰিছে। ইডিয়ে ইতিমধ্যে অভিনেত্ৰীগৰাকীক কেইবাৰো জেৰাও কৰিছে। জেকুলিনক দেশৰ বাহিৰলৈ যোৱাতো বাধা আৰোপ কৰা হৈছে। ইডিয়ে সুকেশে জেকুলিনক দিয়া উপহাৰসমূহ জব্দ কৰাৰ প্ৰক্ৰিয়া অব্যাহত ৰাখিছে।

সুকেশৰ সৈতে আৰু বহুতো বলীউদ তাৰকাৰ নামো জড়িত হৈ পৰিছে। তাৰ ভিতৰত আছে নোৰা ফতেহি, শ্ৰদ্ধা কাপুৰ, শিল্পা ছেট্টি আৰু হৰমন বাৱেজাৰ নাম।