পশ্চিম কাৰ্বি আংলঙৰ পৰা কে পি এল টি আলোচনা বিৰোধী গোটৰ ৪জন কেডাৰ আটক

কালি নিশা সেনাৰ ৰে’ড হ’ৰ্নছ ডিভিজন আৰু আৰক্ষীৰ যুটীয়া অভিযানত কাৰ্বি পিপ’লছ লিবাৰেশ্যন টাইগাৰৰ আলোচনা বিৰোধী গোটৰ ৪জন কেডাৰক আটক কৰা হয়।

কাৰ্বি আংলঙৰ বিভিন্ন স্থানত কাৰ্বি পিপ’লছ লিবাৰেশ্যন টাইগাৰ (কে পি এল টি)ৰ আলোচনা বিৰোধী গোটৰ কেডাৰৰ উপস্থিতি সম্পৰ্কে এক বিশেষ সূত্ৰৰ পৰা লাভ কৰা খবৰৰ ভিত্তিত সেনাৰ ৰে’ড হ’ৰ্নছ ডিভিজনে আৰক্ষীৰ সহযোগত যোৱা ২ এপ্ৰিলৰ পৰা পশ্চিম কাৰ্বি আংলং জিলাৰ বিভিন্ন স্থানত একাধিক অভিযান চলাই আছিল।

গুৱাহাটীস্থিত প্ৰতিৰক্ষা মুখপাত্ৰ লেফটেনেণ্ট কৰ্নেল পি খোংছাই এই কথা জানিবলৈ দি কয় যে যুটীয়া অভিযানকাৰী দলটোৱে যোৱা ২ এপ্ৰিলৰ পৰা কে পি এল টিৰ আলোচনা বিৰোধী গোটৰ কেডাৰৰ গতিবিধি অনুসৰণ কৰি আছিল। অৱশেষত কালি নিশা দলটোৱে জিলাখনৰ বিভিন্ন স্থানৰ পৰা উক্ত সংগঠনটোৰ লিংকমেনকে ধৰি ৪জন কেডাৰক আটক কৰে।

ধৃত কেডাৰ কেইজনৰ পৰা ২টা ৯ এম এম পিষ্টল, ১টা .৩২ এম এম পিষ্টল, ৯ জাঁই সক্ৰিয় গুলী, ১০খন ভুৱা ধনদাবী পত্ৰ জব্দ কৰা হয়।