আইচিচি- ৰ ২০২১ বৰ্ষৰ টেষ্ট দল ঘোষণা: দলত অন্তৰ্ভূক্ত তিনি ভাৰতীয় ক্ৰিকেটাৰ

২০২১ বৰ্ষৰ এদিনীয়া আৰু টি-২০ দলত এজনো ভাৰতীয় ক্ৰিকেটাৰে স্থান লাভ কৰিবলৈ সক্ষম নহ’লেও টেষ্ট দলত স্থান লাভ কৰিছে বিশ্বৰ শীৰ্ষ স্থানৰ টেষ্ট দলটোৰ তিনিজন ক্ৰিকেটাৰে।

তিনি ভাৰতীয় ক্ৰিকেটাৰ ৰোহিত শৰ্মা, ঋষভ পন্ত আৰু ৰবিচন্দ্ৰন অশ্বিনক আইচিচি মেনচ্ টেষ্ট টীম অফ দা ইয়েৰত অন্তৰ্ভূক্ত কৰা হৈছে।

নিউজিলেণ্ডৰ অধিনায়ক কেন উইলিয়ামছনক ২০২১ চনৰ আইচিচি টেষ্ট দলৰ অধিনায় হিচাপে মনোনীত কৰা হৈছে। উইলিয়ামছনৰ নেতৃত্বতে নিউজিলেণ্ডে যোৱা বছৰ ভাৰতক পৰাস্ত কৰি বিশ্ব টেষ্ট চেম্পিয়নশ্বিপৰ খিতাপ দখল কৰিছিল।

তিনিজন ভাৰতীয়ৰ উপৰিও দলটোত নিউজিলেণ্ডৰ দুজন খেলুৱৈ, তিনিজন পাকিস্তানী খেলুৱৈ, এজন অষ্ট্ৰেলিয়ান, এজন শ্ৰীলংকা আৰু এজন ইংলেণ্ডৰ খেলুৱৈ আছে।

 

View this post on Instagram

 

A post shared by ICC (@icc)

ভাৰতীয় টেষ্ট দলৰ অপেনাৰ হিচাপে আত্মপ্ৰকাশ কৰাৰ পিছত ৰোহিত শৰ্মাই যোৱা বৰ্ষত চমকপ্ৰদ প্ৰদৰ্শন দাঙি ধৰিছিল। যোৱা কেলেণ্ডাৰ বৰ্ষত দুটা শতকৰ সৈতে ৪৭.৬৮ গড়ে ৯০৬ ৰাণ সংগ্ৰহ কৰিছিল ৰোহিতে। উল্লেখ্য যে বৰ্তমান ভাৰতীয় টেষ্ট দলৰ সহ-অধিনায়কৰ দায়িত্বত থকা ৰোহিত শৰ্মা শেহতীয়াকৈ কোহলীৰ পদত্যাগৰ পিছত ভাৰতীয় টেষ্ট দলৰ নতুন অধিনায়ক হিচাপে নিৰ্বাচিত হোৱাৰ সম্ভাৱনা আছে।

আনহাতে ঋষভ পন্তে তিনিওটা ফৰ্মেটতে ভাৰতৰ প্ৰথম পচন্দৰ উইকেটকিপাৰ-বেটাৰ হিচাপে নিজকে প্ৰতিষ্ঠা কৰিছে। বিশেষকৈ টেষ্ট ক্ৰিকেটত পন্তে শেহতীয়াকৈ উন্নত প্ৰদৰ্শন আগবঢ়াবলৈ সক্ষম হৈছে। যোৱা বৰ্ষত পন্তে ৩৯.৩৬ গড়ে ১২ খন খেলত ৭৪৮ ৰাণ সংগ্ৰহ কৰিছিল। তদুপৰি উইকেটকিপাৰ হিচাপে ২৩ টা ইনিংছত ৩৯ টা উইকেট চিকাৰ কৰিছিল পন্তে।

আনহাতে নিখুঁত স্পিন যাদুৰে বেটছমেনৰ সন্মুখত প্ৰত্যাহ্বান দাঙি ধৰা তাৰকা অফ স্পিনাৰ অশ্বিনে ৯ খন খেলত ১৬.৬৪ গড়ে ৫৪ টা উইকেট দখল কৰি ভাৰতৰ টেষ্ট দলৰ উত্থানত গুৰুত্বপূৰ্ণ ভূমিকা পালন কৰিছিল। তেওঁ লগতে চিজনটোত ২৫.৩৫ গড়ে ৩৫৫ ৰাণ সংগ্ৰহ কৰে।

২০২১ চনৰ আইচিচি পুৰুষ টেষ্ট দলঃ দিমুথ কৰুণাৰত্নে (শ্ৰীলংকা), ৰোহিত শৰ্মা (ভাৰত), কেন উইলিয়ামচন (অধিনায়ক, নিউজিলেণ্ড), মাৰ্নাছ লাবুচানে (অষ্ট্ৰেলিয়া), জো ৰুট (ইংলেণ্ড), ফাৱাদ আলম (পাকিস্তান), ঋষভ পন্ত, ৰবিচন্দ্ৰন অশ্বিন (ভাৰত), কাইল জেমিচন (নিউজিলেণ্ড), শ্বাহিন শ্বাহ আফ্ৰিদি আৰু হাছান আলী (পাকিস্তান)।