প্ৰয়োজন মাত্ৰ ছয় ৰানৰ; আন এক মাইলষ্ট’নৰ দিশে বিৰাট কোহলী

ৱেষ্ট ইণ্ডিজৰ বিৰুদ্ধে আগন্তুক এদিনীয়া ক্ৰিকেট শৃংখলাত এক নতুন মাইলষ্ট’নত উপনীত হোৱাৰ দিশে ভাৰতীয় ক্ৰিকেট দলৰ প্ৰাক্তন অধিনায়ক তথা তাৰকা ক্ৰিকেটাৰ বিৰাট কোহলী।

এই নতুন ৰেকৰ্ড ক্লাৱত অন্তৰ্ভূক্ত হোৱাৰ বাবে কোহলীক প্ৰয়োজন মাত্ৰ ছয় ৰানৰ। গতিকে ৱেষ্ট ইণ্ডিজৰ বিৰুদ্ধে তিনিখনীয়া এদিনীয়া শৃংখলাৰ সময়তে কোহলী এই লক্ষ্যত উপনীত হোৱা নিশ্চিত।

ঘৰুৱা মাটিত ৫,০০০ এদিনীয়া ৰাণৰ মাইলৰ খুঁটিত উপনীত হোৱা কেৱল দ্বিতীয় গৰাকী ভাৰতীয় বেটাৰ হোৱাৰ দিশে বিৰাট কোহলী।

এই মাইলষ্ট’নত উপনীত হোৱা একমাত্ৰ ভাৰতীয় ক্ৰিকেটাৰ হৈছে কিংবদন্তী বেটাৰ শচীন তেণ্ডুলকাৰে। ভাৰতীয় ক্ৰিকেট ইতিহাসত এতিয়ালৈকে কেৱল তেণ্ডুলকাৰেহে দেশৰ মাটিত এদিনীয়া আন্তঃৰাষ্ট্ৰীয় ক্ৰিকেটত ৫,০০০ বা তাতোধিক ৰান সংগ্ৰহ কৰিছে।

আমোদজনকভাৱে শচীনে তেওঁৰ ১২১ সংখ্যক ইনিংছত ৱেষ্ট ইণ্ডিজৰ বিৰুদ্ধে ভাৰতত ৫,০০০ এদিনীয়া ৰাণৰ লেণ্ডমাৰ্কত উপনীত হৈছিল।

এতিয়া কোহলীৰ ক্ষেত্ৰতো ৱেষ্ট ইণ্ডিজৰ বিৰুদ্ধেই এই ৰেক’ৰ্ড প্ৰতিষ্ঠাৰ সুযোগ আছে। কোহলীয়ে দেওবাৰে প্ৰথম খন এদিনীয়াত ৬ ৰাণ সংগ্ৰহ কৰিবলৈ সক্ষম হ’লেই ভাৰতত তেওঁৰ ৯৬ তম এদিনীয়া ইনিংছত এই কৃতিত্ব অৰ্জন কৰিব পাৰিব।

উল্লেখ্য যে কোহলীয়ে যোৱা দুটা বছৰ ধৰি আন্তঃৰাষ্ট্ৰীয় ক্ৰিকেটত শতক অৰ্জন কৰাত ব্যৰ্থ হৈছে। আগন্তুক শৃংখলাতে তেওঁৰ আন্তৰ্জাতিক শতকৰ খৰাং সমাপ্ত হোৱাৰ আশা কৰিছে ক্ৰিকেট অনুৰাগী সকলে।