ৰাছিয়ান মডেলৰ ৰহস্যজনক মৃত্যু; কিয় নাম সাঙোৰ খালে ৰাষ্ট্ৰপতি পুটিনৰ?

এগৰাকী ৰাছিয়ান মডেলৰ ৰহস্যজনক মৃত্যুৰ স’তে সাঙোৰ খাই পৰিছে দেশখনৰ ৰাষ্ট্ৰপতি ভ্লাদিমিৰ পুটিনৰ নাম। ইউক্ৰেইন যুদ্ধৰ মাজতে ঘটা এই ঘটনাই তুমুল চাঞ্চল্যৰ সৃষ্টি কৰা দেখা গৈছে।

মৃত মডেলগৰাকীৰ নাম হৈছে গ্ৰেটা ভেডলাৰ। ২৩ বৰ্ষীয় এই মডেলগৰাকীয়ে ২০২১ চনৰ জানুৱাৰী মাহত পুটিনক ক্ষুৰধাৰ সমালোচনা কৰিছিল। আনকি পুটিনক চাইক’পাথ তথা মানসিকভাৱে অসুস্থ বুলিও আখ্যা দিছিল।

ৰাষ্ট্ৰপতি পুটিনক এইদৰে সমালোচনা কৰাৰ ঠিক পিছতে মডেলগৰাকী নিৰুদ্দেশ হয়৷ অৱশেষত মডেলগৰাকীৰ মৃতদেহ এটা চ্যুটকেচত উদ্ধাৰ হৈছে।

এতিয়া প্ৰশ্ন উদয় হৈছে যে ৰাষ্ট্ৰপতি পুটিনক মানসিক বিকাৰগ্ৰস্ত বুলি সমালোচনা কৰাৰ বাবেই গ্ৰেটাক হত্যা কৰা হ’ল নেকি? সামাজিক মাধ্যমযোগে পুটিনক লৈ গ্ৰেটাই কেইবাটাও প’ষ্ট কৰিছিল। প্ৰশ্ন উত্থাপন কৰিছিল যে পুটিনৰ দৰে এজন মানুহে দেশৰ মংগলৰ বাবে কিবা কৰাটো সম্ভৱ নে?

অৱশ্যে, শেহতীয়া অনুসন্ধানত প্ৰকাশ পাইছে যে গ্ৰেটাৰ প্ৰাক্তন প্ৰেমিকগৰাকীয়েহে তেওঁক হত্যা কৰে। প্ৰাক্তন প্ৰেমিক দিমিত্ৰি কোৰোৱেনে ইয়াক স্বীকাৰো কৰিছে বুলি জানিব পৰা গৈছে।

প্ৰকাশিত খবৰ মতে, দিমিত্ৰিয়ে হোটেলৰ এটা কোঠাত গ্ৰেটাক উশাহ বন্ধ কৰি হত্যা কৰে৷ গ্ৰেটাক হত্যা কৰি মৃতদেহটো হোটেলৰ কোঠাটোত লুকুৱাই ৰাখে। তাৰপাছতে চ্যুটকেচত মৃতদেহটো ভৰাই এখন পৰিত্যক্ত স্থানত পেলাই থৈ আহে।

কিন্তু কেৱল এয়াই নহয়, ডিমিত্ৰিয়ে নিজৰ অপৰাধ ঢাকি ৰাখিবলৈ আশ্ৰয় লয় ব্যাপক কৌশলৰ।

সেই অনুসৰি মৃত্যু হোৱা গ্ৰেটাৰ সামাজিক মাধ্যমসমূহ তেওঁ চলাবলৈ আৰম্ভ কৰে। সামাজিক মাধ্যমযোগে গ্ৰেটাৰ নামত ডিমিত্ৰিয়ে ফটো প’ষ্ট কৰিবলৈ ধৰে। সেয়ে গ্ৰেটাৰ মৃত্যুৰ পিছতো বহু দিনলৈ জীয়াই থকা বুলিয়ে ভবা হৈছিল৷

কিন্তু পিছত গ্ৰেটাৰ এগৰাকী নিকট বন্ধুৱে সমগ্ৰ ঘটনাৱলী সম্পৰ্কে এটা পূৰ্বানুমাণ কৰে৷ দ্বাৰস্থ হয় মস্কো আৰক্ষীৰ! তাৰ পাছতে পোহৰলৈ আহে সমগ্ৰ হত্যাকাণ্ডৰ ঘটনাটো।