এজেপিৰ হুকুম চান্দ বক্সী আৰু আপৰ মাছুমা বেগমে ৰচিলে নিজৰ দলৰ ভিতৰতে ইতিহাস

গুৱাহাটী পৌৰ নিগমৰ নিৰ্বাচনত প্ৰথমবাৰৰ বাবে প্ৰতিদ্বন্দ্বিতা কৰিয়েই শাসকীয় বিজেপিক শলঠেকত পেলাবলৈ সক্ষম হ’ল ১ নং ৱাৰ্ডৰ অসম জাতীয় পৰিষদৰ প্ৰাৰ্থী হুকুম চান্দ বক্সী আৰু ৪২ নং ৱাৰ্ডৰ আপৰ প্ৰাৰ্থী মাছুমা বেগমে ।

দুয়োটা ৱাৰ্ডতে আপ আৰু এজেপিৰ প্ৰাৰ্থী দুগৰাকী বিপুল ভোটৰ ব্যৱধানত বিজয়ী হৈছে।

১ নং ৱাৰ্ডত বিজয়ী হৈ হুকুম চান্দ বক্সীয়ে এজেপিৰ ইতিহাসতো এক বিশেষ নজিৰ গঢ়িলে। বিগত বিধানসভা নিৰ্বাচনত এখনো আসন লাভ কৰিবলৈ সক্ষম নোহোৱা এজেপিয়ে আজি দলটোৰ ইতিহাসত প্ৰথমবাৰৰ বাবে নিৰ্বাচনী যুঁজত জিকিবলৈ সক্ষম হয়।

দৰাচলতে কংগ্ৰেছৰ পৰা টিকট নোপোৱাৰ পিছতে হুকুম চান্দ বক্সীয়ে অসম জাতীয় পৰিষদত যোগদান কৰি ১ নং ৱাৰ্ডত নিৰ্বাচনী যুঁজত নামিছিল। প্ৰায় ১০০০ ভোটৰ ব্যৱধানত জয় লাভ কৰা হুকুম চান্দ বক্সীয়ে কয় যে ৱাৰ্ডটোৰ সমস্যাসমূহ সমাধানৰ বাবে তেওঁ সকলো ধৰণে চেষ্টা চলাব।

কংগ্ৰেছক সমালোচনা কৰি তেওঁ কয় যে ভূপেন বৰাৰ দাম্ভিকতাৰ বাবেই দলটোৱে মূল্য ভৰিবলগীয়া হৈছে। আনহাতে আম আদমী পাৰ্টীৰ প্ৰাৰ্থী মাছুমা বেগমে ৪২ নং ৱাৰ্ডত বিজেপিৰ সকলো চেষ্টা বিফল কৰি বিজয়ী হয়।

এই বিজয়ত উৎফুল্লিত হৈ পৰা মাছুমা বেগমে কয় যে ৰাজ্যত এতিয়া আপৰ ঢৌ আহিছে।

পানীৰ সমস্যাকে ধৰি ষ্ট্ৰীট লাইট আৰু বাট-পথৰ সমস্যা সমাধানত গুৰুত্ব দিব বুলি মাছুমা বেগমে প্ৰকাশ কৰে। মাছুম বেগম আৰু হুকুম চান্দ বক্সীৰ নাম আপ আৰ এজেপিৰ ইতিহাসত ৰৈ যাব।

কাৰণ তেওঁলোকেই হৈছে ৰাজ্যত দল দুটাৰ হৈ বিজয়ী হোৱা প্ৰথম প্ৰাৰ্থী।