চাইবাৰ অপৰাধৰ বলি লোক সভাৰ অধ্যক্ষ: ওম বিৰলাৰ নামত ভুৱা হোৱাটছএপ একাউণ্ট

শেহতীয়াকৈ ভাৰতৰ শীৰ্ষ কিছু বিষয়া তথা চৰকাৰী বিভাগৰ অফিচিয়েল ৱেবচাইট তথা সামাজিক মাধ্যমৰ একাউণ্ট হেক্ কৰাক লৈ চাঞ্চল্যৰ সৃষ্টি হোৱাৰ পাছত এইবাৰ চাইবাৰ অপৰাধী চক্ৰৰ বলি হৈছে লোকসভাৰ অধ্যক্ষ ওম বিৰলা।

নিম্ন সদনৰ অধ্যক্ষ গৰাকীৰ কাৰ্যালয়ে বুধবাৰে জানিবলৈ দিয়ে যে ওম বিৰলাৰ নামত এটা ভুৱা হোৱাটছএপ একাউণ্ট সৃষ্টি কৰা হৈছে। এই সন্দৰ্ভত সংশ্লিষ্ট কৰ্তৃপক্ষক জনোৱা হৈছে বুলিও কাৰ্যালয়ে উল্লেখ কৰে।

অধ্যক্ষ ওম বিৰলাই এই সন্দৰ্ভত তিনিটা নম্বৰ প্ৰকাশ কৰি এক টুইট যোগে কয়, “কোনো দুৰ্বৃত্তই মোৰ নামত প্ৰ’ফাইল ফটোৰ সৈতে ভুৱা একাউণ্ট সৃষ্টি কৰিছে আৰু সাংসদ আৰু আনসকলক ৭৮৬২০৯২০০৮, ৯৪৮০৯১৮১৮৩, ৯৪৩৯০৭৩৮৭০ নম্বৰৰ পৰা বাৰ্তা প্ৰেৰণ কৰিছে।”

“বিষয়টো সংশ্লিষ্ট কৰ্তৃপক্ষক জনোৱা হৈছে। অনুগ্ৰহ কৰি এই নম্বৰ কেইটা বা অন্যান্য নম্বৰৰ পৰা অহা ফোনকল বা বাৰ্তা উপেক্ষা কৰক আৰু মোৰ কাৰ্যালয়ক অৱগত কৰক।” বিৰলাই টুইটটোত লগতে কয়।

আনহাতে এই চাইবাৰ অপৰাধীৰ সৈতে সম্পৰ্কৰ অভিযোগত উৰিষ্যা আৰক্ষীয়ে ৰাজ্যখনৰ তিনিজন লোকক গ্ৰেপ্তাৰ কৰিছে।

ধৃত তিনিও ব্যক্তিয়ে পূৰ্ব-সক্ৰিয় চিম কাৰ্ড বিক্ৰী কৰিছিল আৰু এনে চিম কাৰ্ড ৰাজহুৱা ক্ষেত্ৰত উপলব্ধ বিৰলাৰ ছবি ব্যৱহাৰ কৰি ভুৱা হোৱাটছএপ একাউণ্ট সৃষ্টি কৰিবলৈ ব্যৱহাৰ কৰা হৈছিল।

উল্লেখ্য যে যোৱা মাহত উপ-ৰাষ্ট্ৰপতি এম ভেংকায়া নাইডুৰ নামত এজন ব্যক্তিয়ে ভিআইপিসহ আন কিছু লোকলৈ আৰ্থিক সহায় বিচাৰি বাৰ্তা প্ৰেৰণ কৰিছিল।