কুকুৰক খোজ কঢ়াবৰ বাবেই এথলীটকক ষ্টেডিয়াম এৰিবলৈ কোৱা আইএএছ দম্পতীক বদলি

কুকুৰৰ ‘সান্ধ্য ভ্ৰমণ’ৰ বাবে এথলীটসকলক তেওঁ দিল্লীৰ ত্যাগৰাজ ষ্টেডিয়াম এৰিবলৈ কৈছিল। এই অভিযোগৰ পিছতে কেন্দ্ৰীয় চৰকাৰে আইএএছ দম্পতী সঞ্জীৱ খিৰৱাৰ আৰু ৰিংকু ডুগ্গাক দিল্লীৰ বাহিৰলৈ বদলি কৰে। সঞ্জীৱক লাডাখলৈ বদলি কৰা হৈছে। ৰিংকুক অৰুণাচল প্ৰদেশলৈ পঠিওৱা হৈছে।

বাতৰি অনুসৰি, সঞ্জীৱ আৰু ৰিংকুৰ ওপৰত ত্যাগাৰাজ ষ্টেডিয়ামৰ আন্তঃগাঁথনিৰ অপব্যৱহাৰ কৰাৰ অভিযোগ উত্থাপিত হোৱাৰ পিছত গৃহ মন্ত্ৰালয়ে দিল্লীৰ মুখ্য সচিবৰ পৰা এক প্ৰতিবেদন বিচাৰিছিল। দিল্লীৰ মুখ্য সচিবে এই প্ৰতিবেদন সন্ধিয়াই দাখিল কৰে।

লগতে পঢ়ক: যুদ্ধ অপৰাধ! ইউক্ৰেইনৰ আদালতত আৰু দুজন ৰাছিয়ান সৈনিক দোষী সাব্যস্ত

সেই প্ৰতিবেদনৰ আধাৰত অৰুণাচল প্ৰদেশ, গোৱা, মিজোৰাম, কেন্দ্ৰীয় শাসিত অঞ্চল (এজিএমইউটি) কেডাৰৰ বিষয়া দুজনৰ বিৰুদ্ধে উপযুক্ত ব্যৱস্থা গ্ৰহণ কৰা হ’ব। তাৰমাজতে সঞ্জীৱ আৰু ৰিংকুক “শাস্তিমূলক বদলি” দিয়া হৈছে।

দ্য ইণ্ডিয়ান এক্সপ্ৰেছৰ বাতৰি অনুসৰি যোৱা কেইমাহমানৰ পৰা খেলুৱৈ আৰু প্ৰশিক্ষকসকলে অভিযোগ কৰিছিল যে দিল্লীৰ তদানীত্বন প্ৰধান সচিব (ৰাজহ) সঞ্জীৱ খিৰৱাৰৰ কুকুৰটোক ত্যাগাৰাজ ষ্টেডিয়ামত সন্ধিয়া খোজ কঢ়াবৰ বাবে আগতীয়াকৈ অনুশীলন সম্পূৰ্ণ কৰিবলৈ বাধ্য কৰা হৈছিল।

এগৰাকী প্ৰশিক্ষকৰ উদ্ধৃতি দি বাতৰিটোত কোৱা হৈছে যে পূৰ্বে দিল্লী চৰকাৰৰ দ্বাৰা পৰিচালিত ষ্টেডিয়ামখনত নিশা ৮ ৰ পৰা  ৮.৩০ বজালৈ অনুশীলন চলিছিল। কিন্তু যোৱা কেইমাহমানৰ পৰা সন্ধিয়া ৭ বজালৈ ভিতৰতে ষ্টেডিয়াম এৰিবলৈ বাধ্য হৈছিল যাতে সঞ্জীৱ আৰু তেওঁৰ কুকুৰটোৱে খেলপথাৰত খোজ কাঢ়িব পাৰে। ষ্টেডিয়ামখন ২০১০ চনত কমনৱেলথ গেমছৰ বাবে নিৰ্মাণ কৰা হৈছিল।

লগতে পঢ়ক: হিন্দীৰ দৰে তামিলো হওঁক আনুষ্ঠানিক ভাষা; প্ৰধানমন্ত্ৰী মোডীৰ সন্মুখতে দাবী ষ্টেলিনৰ

আনহাতে আইএএছ সঞ্জীৱ খিৰৱাৰে তেওঁৰ বিৰুদ্ধে উত্থাপিত অভিযোগ সম্পূৰ্ণ মিছা বুলি দাবী কৰে। কিন্তু তেওঁ স্বীকাৰ কৰে যে তেওঁ পোহনীয়া কুকুৰটোৰ সৈতে মাজে মাজে ষ্টেডিয়ামলৈ গৈছিল। তেওঁ দাবী কৰে যে তাৰ বাবে খেলুৱৈসকলৰ কোনো সমস্যা হোৱা নাছিল।