হোজাইৰ এছ ও এছ ভিলেজৰ শিশুসকলৰ মাজত ছাতি আৰু ক্ৰীড়া সামগ্ৰী বিতৰণ

সোমবাৰে অল ইণ্ডিয়া প্ৰফেশ্যনেল কংগ্ৰেছৰ (এআইপিচি) পূব মণ্ডলে হোজাইৰ এছ ও এছ ভিলেজৰ শিশু সকলৰ মাজত ৫০ টা ছাতিৰ লগতে বিভিন্ন ক্ৰীড়া সামগ্ৰী বিতৰণ কৰে।

এই অনুষ্ঠানত অসম এআইপিচিৰ আঞ্চলিক পৰিচালন বিষয়া তথা সচিব অৰ্ণৱ কান্তি দেয়ে নিজৰ ভাষণ প্ৰসংগত কয়-‘সমাজৰ বাবে আমাৰ এয়া দায়িত্ব। সকলো পেছাদাৰী সংগঠনে আগবাঢ়ি আহি সমাজ উন্নয়নৰ হকে কাম কৰিব লাগে’।

ইয়াৰ উপৰি তেওঁ ভৱিষ্যতত যিকোনো পৰিস্থিতিৰ মুখামুখি হ’বলৈ তথা নিজৰ নিজৰ দক্ষতা বিকাশৰ বাবে প্ৰত্যেক শিশুকে সকলো ধৰণৰ কাৰ্যসূচীতে অংশ গ্ৰহণ কৰিবলৈ অনুৰোধ জনায়।

ইফালে এআইপিচিয়ে শিশু সকলৰ মাজত আৱশ্যকীয় সামগ্ৰী বিতৰণ কৰা কাৰ্যক আদৰণি জনোৱাৰ লগতে ধন্যবাদ জ্ঞাপন কৰে এছ ও এছ ভিলেজৰ সঞ্চালক পৰেশ বদ্যকাৰে।

বদ্যকাৰে এই প্ৰসংগত কয় যে শিশুসকলে ভৱিষ্যতে আগবাঢ়ি যোৱাৰ ক্ষেত্ৰত তথা সঠিক কেৰিয়াৰ বাচনি কৰাৰ ক্ষেত্ৰত এনেধৰণৰ উল্লেখনীয় পদক্ষেপে যথেষ্ট সহায় কৰিব। ইয়াৰোপৰি শিশুসকলৰ লগত পেছাদাৰী সংগঠন সমূহৰ লোক সকলে মত বিনিময় কৰাত যথেষ্ট উৎসাহী তথা মনত সাহস লাভ কৰিব বুলিও উল্লেখ কৰে সঞ্চালকগৰাকীয়ে।

এই অনুষ্ঠানৰ আৰম্ভণিতে এছ ও এছ ভিলেজৰ শিশুসকলে গীত পৰিৱেশন কৰি এআইপিচিৰ সদস্যসকলক সন্মান জনোৱাৰ লগতে ধন্যবাদ জ্ঞাপন কৰে।