শক্তিপীঠ কামাখ্যাত মহাৰাষ্ট্ৰৰ বিসম্বাদী নেতা একনাথ সিন্দে: আজিয়ে মহাৰাষ্ট্ৰলৈ উভতাৰ সম্ভাৱনা

বিসম্বাদী ৰাজনীতিৰ ফলশ্ৰুতিত ৰাজনৈতিক সংকটৰ সন্মুখীন হোৱা মহাৰাষ্ট্ৰত কাইলৈ অনুষ্ঠিত হ’ব আস্থা ভোট। মহাৰাষ্ট্ৰ বিধানসভাত কাইলৈ নিজৰ সংখ্যাগৰিষ্ঠতা প্ৰমাণ কৰিব লাগিব মুখ্যমন্ত্ৰী উদ্ধৱ ঠাকৰেই। তাৰ পূৰ্বে গুৱাহাটীত বাহৰ পাতি থকা বিসম্বাদী বিধায়কৰ নেতা একনাথ সিন্দেই আজি মা কামাখ্যাৰ আশিস গ্ৰহণ কৰে।

কাইলৈ সকলো সতীৰ্থ বিধায়কক লগত লৈ মুম্বাইলৈ ৰাওনা হ’ব বিসম্বাদী নেতাগৰাকী। কামাখ্যাত সিন্দেই নিজমুখে ঘোষণা কৰিছে এই কথা। কিন্তু শেহতীয়া সূত্ৰ অনুসৰি আজি দুপৰীয়া ১২ বজাতে মুম্বাইলৈ ৰাওনা হোৱাৰ সম্ভাৱনা আছে বিসম্বাদী বিধায়কসকল।

কামাখ্যা দৰ্শনৰ পিছত সিন্দেই কয়, “মহাৰাষ্ট্ৰৰ সকলো জনতাৰ সুখ সমৃদ্ধি আৰু শান্তি কামনা কৰি মা কামাখ্যাৰ ওচৰত আশিষ ল’ব আহিছো। কাইলৈ আমি সকলো বিধায়কক লগত লৈ মুম্বাইলৈ ৰাওনা হ’ম।”

সিন্দেৰ লগতে আন কেইবাগৰাকীও বিধায়কে কামাখ্যাত আশীষ গ্ৰহণ কৰে। মহাৰাষ্ট্ৰৰ বিসম্বাদী বিধায়কসকলৰ কামাখ্যা দৰ্শনৰ সময়ত অসমৰ থাওৰা সমষ্টিৰ বিধায়ক সুশান্ত বৰগোহাঁয়েও সংগ দিয়ে।

উল্লেখ্য যে, যোৱা কিছুদিনৰ পৰা গুৱাহাটীৰ ৰেডিচন ব্লু হোটেলত বাহৰ পাতি থকা বিসম্বাদী শিবিৰটোৰ নেতৃত্ব বহন কৰা একনাথ সিন্দেই শিৱসেনাৰ ৪০ গৰাকী বিধায়কসহ মুঠ ৫০ গৰাকী বিধায়ক তেওঁৰ সমৰ্থনত আছে বুলি দাবী কৰিছিল।

শেহতীয়াকৈ বিসম্বাদী শিবিৰটোৱে শিৱসেনাৰ জন্মদাতা বাল ঠাকৰেৰ হিন্দুত্ববাদী আদৰ্শ প্ৰতিনিয়ত কঢ়িয়াই নিব বুলি দাবী কৰি শিৱসেনা বালাচাহেব নামৰ নতুন দলৰ ঘোষণা কৰিছিল। কিন্তু বালাচাহেবৰ পুত্ৰ তথা মুখ্যমন্ত্ৰী উদ্ধৱ ঠাকৰেই তেওঁৰ পিতৃৰ নাম এইদৰে ব্যৱহাৰ কৰিব নোৱাৰিব বুলি সকীয়াই দিছিল।

আনহাতে উদ্ধৱ ঠাকৰেৰ পুত্ৰ তথা কেবিনেট মন্ত্ৰী আদিত্য ঠাকৰেই শেহতীয়াকৈ গুৱাহাটীত বাহৰ পাতি থকা বিসম্বাদী বিধায়কৰ ২০ গৰাকীয়ে ঠাকৰে শিবিৰৰ সৈতে যোগাযোগত আছে বুলি দাবী কৰিছিল।

এনে পৰিস্থিতিত কাইলৈ বিধানসভাত কোন পক্ষই নিজৰ সংখ্যাগৰিষ্ঠতা প্ৰমাণ কৰিব পাৰে, সি লক্ষ্যণীয় হ’ব।