Sangeet shree Prabhat Sarma award সঙ্গীতশ্ৰী প্ৰভাত শৰ্মা উদগনি বঁটা,২০২২ নুপুৰ জ্যোতি মেধিলৈ

জীৱিত কালতে শিল্পীক যৎকিঞ্চিত সন্মান জনোৱাৰ উদ্দেশ্যে লোক সঙ্গীতৰ আজীৱন সাধক প্ৰভাত শৰ্মাৰ কায়িক বৰ্তমানত প্ৰকাশন গোষ্ঠী চিত্ৰাচলে ২০১৮ ইং চনৰে পৰা প্ৰদান কৰি আহিছিল ‘সঙ্গীতশ্ৰী প্ৰভাত শৰ্মা উদগনি বঁটা’। শিল্পী গৰাকীৰ জন্ম তিথি ৭ জুলাইৰ দিনটোতে প্ৰতি বছৰে সংশ্লিষ্ট বঁটা প্ৰাপকৰ নাম ঘোষণা কৰা হৈছিল। সঙ্গীতশ্ৰী প্ৰভাত শৰ্মা উদগনি বঁটা সমিতিয়ে সিদ্ধান্ত গ্ৰহণ কৰিছে যে- শিল্পী গৰাকীৰ স্মৃতি ৰক্ষাৰ্থে কায়িকভাৱে অবৰ্তমানতো এই বঁটা প্ৰদান অব্যাহত ৰাখিব।

বিশেষকৈ লোক সঙ্গীতৰ সাধনাত ব্ৰতী নৱ প্ৰজন্মক উদগনি দিয়াই এই বটা প্ৰদানৰ মুখ্য উদ্দেশ্য। ২০২২ বৰ্ষৰ এই বঁটাৰ বাবে লেখক-সাংবাদিক উৎপল মেনা, নাট্যকৰ্মী নিৰ্মল দাস আৰু লেখক-শিল্পী মুকুল ৰাভাৰ নেতৃত্বত বিশেষ জুৰী মণ্ডলীয়ে লোকবাদ্য শিল্পী নুপুৰ জ্যোতি মেধিক বাছনি কৰিছে।

বৰপেটাৰ উদীয়মান শিল্পী গৰাকীয়ে খোলবাদন, ভোৰতাল নৃত্য, সত্ৰীয়া নৃত্যৰে অসমীয়া সংস্কৃতিৰ উত্তৰণ আৰু প্ৰচাৰত সহায় কৰি আহিছে। বৰপেটাৰ এক সাংগীতিক অনুষ্ঠানত নুপুৰ জ্যোতি মেধিৰ লগতে ২০২১ৰ ‘সঙ্গীতশ্ৰী প্ৰভাত শৰ্মা উদগনি বঁটা’ৰ বাবে বাছনি কৰা ৰাভা লোক সংগীতৰ উদীয়মান গায়িকা বৰষা ৰাভাকো বঁটা প্ৰদান কৰা হব বুলি “চিত্ৰাচল”ৰ সম্পাদক মৃণাল শৰ্মাই এক প্ৰেছ বিজ্ঞপ্তি যোগে জানিব দিছে।