বিজ্ঞাপনৰ চৰকাৰ! পাঁচ বছৰত বিজ্ঞাপনৰ নামত ব্যয় ৩,৩৩৯.৪৯ কোটি টকা

বিকাশৰ শ্ল’গান আওৰাই দেশক বিকাশৰ দিশলৈ আগুৱাই নিয়াত সফল হওক বা নহওক, নিজৰ প্ৰচাৰৰ ক্ষেত্ৰত কোনো ত্ৰুটি ৰখা নাই মোদী চৰকাৰে। যোৱা পাঁচ বছৰত কেন্দ্ৰীয় চৰকাৰে নিজৰ প্ৰচাৰৰ বাবে বিজ্ঞাপনৰ নামতে ব্যয় কৰিছে ৩,৩৩৯.৪৯ কোটি টকা।

খোদ কেন্দ্ৰীয় চৰকাৰৰ তথ্য আৰু সম্প্ৰচাৰ মন্ত্ৰী অনুৰাগ ঠাকুৰে ৰাজ্যসভাত এই তথ্য প্ৰকাশ কৰিছে।

আজি ৰাজ্যসভাত উত্থাপিত এক প্ৰশ্নৰ লিখিত উত্তৰত ঠাকুৰে কয় যে চৰকাৰে ২০১৭ চনৰ পৰা পাঁচ বছৰৰ ভিতৰত প্ৰিণ্ট আৰু ইলেক্ট্ৰনিক মাধ্যমত বিজ্ঞাপনৰ বাবে ৩,৩৩৯.৪৯ কোটি টকা ব্যয় কৰিছে।

মন্ত্ৰীগৰাকীয়ে দাখিল কৰা তথ্য অনুসৰি চৰকাৰে ২০১৭ বৰ্ষৰ পৰা চলিত বৰ্ষৰ ১২ জুলাইলৈকে প্ৰিণ্ট মিডিয়াত বিজ্ঞাপনৰ বাবে ১,৭৫৬.৪৮ কোটি টকা ব্যয় কৰিছে।

একে সময়তে ইলেক্ট্ৰনিক মাধ্যমত বিজ্ঞাপনৰ নামত ১,৫৮৩.০১ কোটি টকা ব্যয় কৰা হৈছে বুলি ঠাকুৰে লগতে কয়।

চেণ্ট্ৰেল ব্যুৰো অৱ কমিউনিকেচনৰ জৰিয়তে চৰকাৰে এই ব্যয় কৰিছে বুলি মন্ত্ৰী অনুৰাগ ঠাকুৰে সংসদত জানিবলৈ দিয়ে।

মন্ত্ৰীগৰাকীয়ে বিদেশী মাধ্যমত বিজ্ঞাপনৰ বাবে চৰকাৰৰ কোনো মন্ত্ৰালয় বা বিভাগে কোনো ব্যয় কৰা হোৱা নাই বুলিও লগতে উল্লেখ কৰে।