আমৰলি পৰুৱাৰ টোপ: অসমৰ অন্যতম জনপ্ৰিয় এক সুস্বাদু থলুৱা খাদ্য

অসমৰ থলুৱা খাদ্যসম্ভাৰৰ জুতিয়ে সদায়ে এক সুনাম বৰ্তাই ৰাখিছে। বিভিন্ন থলুৱা খাদ্যসম্ভাৰৰ অভূতপূৰ্ব জুতিয়ে আন্ত:ৰাষ্ট্ৰীয় পৰ্যায়তো অপাৰ জনপ্ৰিয়তা অৰ্জন কৰিছে। সাধাৰণতে অত্যধিক মচলা আৰু তেল বৰ্জিত খাদ্য হিচাপে অসমীয়া থলুৱা ৰন্ধন প্ৰণালী সুকীয়া সোৱাদেৰে পৰিপূৰ্ণ।

অসমত পোৱা কম পৰিচিত আৰু অনন্য খাদ্য সামগ্ৰীবোৰৰ ভিতৰত আমৰলি পৰুৱাৰ টোপ অন্যতম। বহাগ বিহুৰ সময়ত সাধাৰণতে এই খাদ্য সামগ্ৰীৰ অধিক প্ৰচলন হয়।

আমৰলি টোপত প্ৰ’টিন, লো, কেলচিয়াম আৰু ভিটামিন বি12 যথেষ্ট পৰিমাণে উপলব্ধ। তদুপৰি ই এজন ব্যক্তিক বহুতো জলবাহিত ৰোগৰ পৰা সুৰক্ষিত কৰিব পাৰে।

আমৰলি পৰুৱাৰ টোপৰ খাদ্য উপকৰণ প্ৰস্তুত কৰিবলৈ একাপ আমৰলি টোপৰ লগত এটা মিহিকৈ কটা পিঁয়াজ, জলকীয়া, সামান্য পৰিমাণৰ সৰিয়হৰ তেল, গৰম মচলা, জিৰা গুৰি, ধনিয়া গুৰি, হালধি আৰু নিমখৰ প্ৰয়োজন।

পৰুৱাৰ টোপবোৰ পানীত ধুই কেৰাহীত প্ৰয়োজন অনুসৰি সৰিয়হৰ তেল দি তেলখিনি গৰম হোৱাৰ পিছত কটা পিঁয়াজ দিব লাগে আৰু পিঁয়াজখিনি সামান্য ৰঙা নোহোৱালৈকে ভাজিব লাগে।

তাৰ পিছত ইয়াত আমৰলি টোপখিনি দি হালধি, জিৰা আৰু ধনিয়া গুৰি ছটিয়াই প্ৰায় দুই মিনিট সময় ভাজিব লাগে।

জলকীয়া আৰু নিমখ দিয়াৰ পিছত কেৰাহীটো ঢাকনি এখনেৰে ঢাকি পাঁচ মিনিটৰ বাবে কম জুইত ভালদৰে সিজিবলৈ দিব লাগে।

শেষত গৰম মচলা দি দুইমিনিট সময় হেতাৰে ভালকৈ লৰাই ভাজিব লাগে আৰু ভজা হ’লে জুইৰ পৰা নমাই ৰাখিব লাগে।

অতি কম সময়তে আৰু কম কষ্টতে ৰন্ধা এই খাদ্য উপকৰণ ৰাতিপুৱাৰ আহাৰ, দুপৰীয়াৰ আহাৰ বা ৰাতিৰ আহাৰৰ সৈতে সুন্দৰকৈ পৰিৱেশন কৰিব পাৰি।