জয়মালা বিতৰ্ক আৰু কিছু প্ৰাসংগিক প্ৰশ্ন

বৰ্তমান তামিলনাডুৰ শ্ৰীভিলিপুথুৰ আন্দাল মন্দিৰত বন্দী হৈ থকা অসমৰ জয়মালা নামৰ এটা হাতী সংবাদ মাধ্যমৰ লগতে সামাজিক মাধ্যমতো চৰ্চাৰ কেন্দ্ৰবিন্দু হৈ পৰিছে। পশু অধিকাৰ সংগঠন পেটা (পিপল ফৰ এথিকেল ট্ৰিটমেণ্ট অফ এনিমেলছ)- ই এটা ভিডিঅ’ পোষ্ট কৰাৰ পিছত জয়মালাই সংবাদ মাধ্যমৰ দৃষ্টি আকৰ্ষণ কৰে। এই ভিডিঅ’টো পশু চিকিৎসা পৰিদৰ্শনৰ সময়ত লোৱা হৈছিল বুলি দাবী কৰা হৈছিল।

পেটাৰ ভিডিঅ’টোত দাবী কৰা হৈছিল যে হাতীটোক মন্দিৰত অবৈধভাৱে ৰখা হৈছে। হাতীটোক কৃষ্ণন কোবিলৰ পৱিত্ৰ গৰ্ভগৃহত প্ৰহাৰ কৰা হৈছে বুলি অভিযোগ কৰি পেটাই ভিডিঅ’টোত লগতে ২০২১ চনত গছত বান্ধি নিৰ্মমভাৱে প্ৰহাৰ কৰা হৈছিল বুলিও দাবী কৰিছিল।

অৱশ্যে, তামিলনাডু চৰকাৰে পেটাৰ এই ভিডিঅ’টো ভুৱা বুলি দাবী কৰিছিল। তামিলনাডু চৰকাৰে ৩১ ছেকেণ্ডৰ এটা ভিডিঅ’ টুইট কৰি জয়মালা নামৰ হাতীটো সম্পূৰ্ণৰূপে সুস্থ অৱস্থাত আছে বুলি উল্লেখ কৰিছিল। টুইটটোত পেটাক টেগ কৰি এই ভিডিঅ’টো সোমবাৰে দৃশ্যগ্ৰহণ কৰা হৈছিল বুলি তামিলনাডু চৰকাৰে লগতে দাবী কৰে।

তামিলনাডু চৰকাৰৰ হিন্দু ধৰ্মীয় আৰু দাতব্য এণ্ডোমেণ্ট বিভাগে প্ৰকাশ কৰা ভিডিঅ’টোত এটা হাতীক পুখুৰীত গা ধুই থকা দেখিবলৈ পোৱা গৈছিল।

ইফালে এই বিতৰ্কৰ মাজতে আন্তৰ্জাতিকভাৱে স্বীকৃতিপ্ৰাপ্ত হাতী চিকিৎসক পদ্মশ্ৰী কুশল কোঁৱৰ শৰ্মাকে ধৰি বিশেষজ্ঞৰ এটা দলে তামিলনাডুৰ মন্দিৰত জয়মালা আৰু আন বন্দী হাতীৰ পৰীক্ষা কৰিবলৈ আৰু ৰাজ্যলৈ ঘূৰাই অনাৰ উদ্দেশ্যে চেন্নাইত উপস্থিত হৈছিল।

কিন্তু অসমৰ পৰা যোৱা এই দলটোক জয়মালাৰ লগতে আন হাতীসমূহৰ পৰীক্ষা কৰিবলৈ অনুমতি দিয়া হোৱা নাছিল। অৱশ্যে জয়মালা পৰীক্ষা কৰিবলৈ নাপালেও ডাঃ শৰ্মাই প্ৰচাৰ হোৱা ভিডিঅ’টো পুৰণি বুলি সন্দেহ প্ৰকাশ কৰি জয়মালাক এতিয়া ভাল ব্যৱহাৰ কৰা হৈছে আৰু সঠিকভাৱে যত্ন লোৱা হৈছে বুলি মন্তব্য কৰিছিল।

আনহাতে আন্না জুলজিকেল পাৰ্কৰ সঞ্চালক শ্ৰীনিবাস আৰ ৰেড্ডীয়ে এক বিবৃতি যোগে উল্লেখ কৰিছিল যে ভিডিঅ’টো প্ৰচাৰ হোৱাৰ পিছত অসমৰ পৰা এটা দল তামিলনাডুত উপস্থিত হৈছিল। কিন্তু এই ভিডিঅ’টো পুৰণি আছিল আৰু সেই সময়ত হাতীটোৰ মাউতক তৎক্ষণাৎ বৰ্খাস্ত কৰাৰ লগতে ঘটনাটোত দোষী সাব্যস্ত হোৱা সকলৰ বিৰুদ্ধে ব্যৱস্থা গ্ৰহণ কৰা হৈছিল বুলি তেওঁ লগতে কয়।

এই সমগ্ৰ ঘটনাৰাজিয়ে স্বাভাৱিকতেই বহুকেইটা প্ৰশ্ন উত্থাপন কৰিছে-

১) যদি তামিলনাডু চৰকাৰৰ দাবী সঁচা হয়, পশু অধিকাৰ সংগঠন পেটাই কিয় এটা পুৰণি ভিডিঅ’ প্ৰচাৰ কৰিছিল?

২) জয়মালাক অত্যাচাৰ কৰাৰ পুৰণি ভিডিঅ’ প্ৰচাৰ কৰি পেটা লাভ কি হ’ব?

৩) যদি পেটাৰ এই ভিডিঅ’টো পুৰণি বা ভুৱা হয়, অসম চৰকাৰে বিশেষজ্ঞৰ দলটোক তামিলনাডুলৈ কিয় তাৎক্ষণিকভাৱে প্ৰেৰণ কৰিছিল?

৪) যদি জয়মালাৰ ভালদৰে চোৱাচিতা কৰা হৈছে, তেন্তে তামিলনাডু চৰকাৰে জয়মালাৰ শাৰীৰিক পৰীক্ষা কৰাৰ বাবে অসমৰ পৰা যোৱা বিশেষজ্ঞৰ দলটোক অনুমতি দিবলৈ কিয় অস্বীকাৰ কৰিছিল?

উল্লেখ্য যে অসমৰ শ শ হাতী তামিলনাডু, কৰ্ণাটক, কেৰালা, গুজৰাট, ৰাজস্থান, বিহাৰ আৰু উত্তৰ প্ৰদেশৰ মন্দিৰত বন্দী হৈ আছে বুলি ইতিমধ্যে জানিব পৰা গৈছে। অসমৰ বন বিভাগে জয়মালাৰ ওপৰত তৎকালীন প্ৰতিক্ৰিয়া প্ৰকাশ কৰাৰ দৰে এই হাতীসমূহৰ ক্ষেত্ৰতো কোনো ভূমিকা পালন কৰিবনে, সেয়াও লক্ষ্যণীয় হ’ব।