বঙাইগাঁও জিলাত ৫৫২ টা কেন্দ্ৰত পলিঅ’ প্ৰতিষেধক প্ৰদানঃ ১ লাখ ৯ হেজাৰ সাতশ শিশুক পলিঅ’ প্ৰতিষেধক প্ৰদানৰ লক্ষ্য

বঙাইগাঁও জিলা স্বাস্থ্য সমিতিয়ে দেওবাৰে উপ-ৰাষ্ট্ৰীয় টিকাকৰণ দিৱস উপলক্ষ্যে বঙাইগাঁও খণ্ড প্ৰাথমিক স্বাস্থ্য কেন্দ্ৰত পলিঅ’ প্ৰতিষেধক প্ৰদানৰ শুভাৰম্ভণি কৰে।জিলা উপায়ুক্ত তথা জিলা স্বাস্থ্য সমিতিৰ অধ্যক্ষ নবদ্বীপ পাঠকে উক্ত খণ্ড প্ৰাথমিক স্বাস্থ্য কেন্দ্ৰত শিশুক এই পলিঅ’ প্ৰতিষেধক খুৱাই পলিঅ’ প্ৰতিষেধক প্ৰদানৰ আনুষ্ঠানিক শুভাৰম্ভণি কৰে।

জিলা উপায়ুক্তগৰাকীয়ে কয় যে অসমত এইবাৰ প্ৰথমবাৰৰ বাবে উপ-ৰাষ্ট্ৰীয় টিকাকৰণ দিৱসত পলিঅ’ প্ৰতিষেধক প্ৰদান কৰা হৈছে। জিলাখনত স্থাপন কৰা প্ৰায় ৫৫২ টা পলিঅ’ প্ৰতিষেধক প্ৰদান কেন্দ্ৰত শূন্যৰ পৰা পাঁচ বছৰৰ শিশুক পলিঅ’ প্ৰতিষেধক প্ৰদানৰ ব্যৱস্থা কৰা হৈছে।জিলাখনৰ লক্ষ্য নিৰ্ধাৰিত প্ৰায় ১ লাখ ৯ হেজাৰ ৭ শ শিশুক পলিঅ’ প্ৰতিষেধক প্ৰদানৰ বাবে প্ৰায় ২০০০ (দুহেজাৰ) স্বাস্থ্য কৰ্মীক নিয়োগ কৰা হৈছে।দেওবাৰে যিসকল শিশুক কিবা কাৰণত পলিঅ’ প্ৰতিষেধক প্ৰদান কেন্দ্ৰলৈ অভিভাৱকে লৈ নাহে সেইবিলাক শিশুক ১৯ আৰু ২০ছেপ্টেম্বৰত ঘৰে ঘৰে গৈ পলিঅ’ প্ৰতিষেধক প্ৰদান কৰা হ’ব বুলি উপায়ুক্তগৰাকীয়ে জানিবলৈ দিয়ে।

পলিঅ’ প্ৰতিষেধক প্ৰদান উপলক্ষ্যে বঙাইগাঁও খণ্ড প্ৰাথমিক স্বাস্থ্য কেন্দ্ৰত অনুষ্ঠিত সভাত উপায়ুক্তগৰাকীয়ে এই কথা প্ৰকাশ কৰে।সভাত অতিৰিক্ত উপায়ুক্ত(স্বাস্থ্য) শ্যামল ক্ষেত্ৰ গগৈয়ে অনুষ্ঠানত উপস্থিত থকা অভিভাৱকসকলক আহ্বান জনায় যে যিসকল পৰিয়ালে এই পলিঅ’ প্ৰতিষেধক প্ৰদান কৰাৰ বিষয়ে গম পোৱা নাই তেওঁলোকক এই বিষয়ে যাতে কয় ৷ অনুষ্ঠানত যুটীয়া স্বাস্থ্য সেৱা সঞ্চালক ডা:পৰেশ কুমাৰ ৰয়ে কয় যে ভাৰতক পলিঅ’মুক্ত হিচাপে ঘোষণা কৰা হৈছিল যদিও চুবুৰীয়া দেশৰ পৰা হোৱা প্ৰব্ৰজনৰ ফলত ভাৰতবৰ্ষত পলিঅ’ৰ সংক্ৰমণ হোৱাৰ সম্ভাৱনা নুই কৰিব নোৱাৰি। সেয়েহে দেওবাৰে উপ-ৰাষ্ট্ৰীয় টিকাকৰণ দিৱসত পলিঅ’ প্ৰতিষেধক প্ৰদান কৰি ভাৰতৰ অন্যান্য ৰাজ্যৰ লগতে অসমকো পলিঅ’মুক্ত কৰাৰ বাবে ব্যৱস্থা গ্ৰহণ কৰা হৈছে।

অনুষ্ঠানত জিলা টিকাকৰণ বিষয়া ডা: পুস্পেন্দু দাস, বঙাইগাঁও খণ্ড প্ৰাথমিক স্বাস্থ্য কেন্দ্ৰৰ মহকুমা চিকিৎসা আৰু স্বাস্থ্য বিষয়া ডা:মহিবুল ইছলাম,আৰু ডা:প্ৰণৱ কুমাৰ ৰয়,ডা:বাদল সৰকাৰ, ডা:বিনীতা ডেকা আদি কৰি কেবাগৰাকীও চিকিৎসকৰ লগতে ষ্টাফ নাৰ্ছ আৰু নিজ শিশুক পলিঅ’ প্ৰতিষেধক প্ৰদান কৰিবলৈ অহা ভালেসংখ্যক অভিভাৱক উপস্থিত থাকে।