অন্ধ্ৰ প্ৰদেশৰ চিকিৎসালয়ত ভয়াৱহ অগ্নিকাণ্ড: প্ৰাণ হেৰুৱালে দুই সন্তানসহ চিকিৎসকে

আজি পুৱা অন্ধ্ৰ প্ৰদেশৰ চিত্তুৰ জিলাৰ এখন চিকিৎসালয়ত সংঘটিত হয় এক ভয়াৱহ অগ্নিকাণ্ড। এই অগ্নিকাণ্ডত শোকাৱহভাৱে মৃত্যুক আঁকোৱালি লয় দুই সন্তানসহ এগৰাকী চিকিৎসকে। চিত্তুৰৰ কাৰ্তিকেয়া চিকিৎসালয় ভৱনত এই শোকাৱহ ঘটনা সংঘটিত হৈছে।

নিহত চিকিৎসক গৰাকীক ডাঃ ৰবিশংকৰ ৰেড্ডী বুলি চিনাক্ত কৰা কৰা হৈছে। আনহাতে তেওঁৰ ৯ বছৰীয়া কন্যা সন্তান আৰু ১৪ বছৰীয়া পুত্ৰ সন্তানো এই ঘটনাত নিহত হয়।

প্ৰাৰম্ভিক অনুসন্ধানৰ ভিত্তিত অগ্নিনিৰ্বাপক বাহিনীয়ে শ্বৰ্ট চাৰ্কিটৰ ফলতে চিকিৎসালয়খনত জুই লাগিছিল বুলি সন্দেহ কৰিছে। ডাঃ ৰবিশংকৰ ৰেড্ডীৰ পৰিয়াল কাৰ্তিকেয়া চিকিৎসালয়ৰ ভৱনতে বাস কৰিছিল। চিকিৎসালয়ত জুই লগাৰ সময়ত পৰিয়ালটো শুই আছিল বুলি জানিব পৰা গৈছে।

অগ্নি নিৰ্বাপক বাহিনীৰ উদ্ধাৰকাৰী কৰ্মীয়ে কোঠাৰ দুৱাৰ ভাঙি শিশু দুটিক উদ্ধাৰ কৰি চিকিৎসালয়লৈ প্ৰেৰণ কৰিছিল যদিও উশাহত বিষাক্ত কাৰ্বন মনোক্সাইড গেছৰ অত্যাধিক পৰিমাণে ভিতৰলৈ সোমোৱাৰ বাবে শিশু দুটিক সুস্থ কৰাত বিফল হয় চিকিৎসকসকল।

আনহাতে চিকিৎসক ৰবিশংকৰ ৰেড্ডীৰ পত্নী আৰু মাতৃ জুইৰ পৰা কোনোমতে কোনো হানি নোহোৱাকৈ ৰক্ষা পৰে।

অগ্নি নিৰ্বাপক বাহিনীৰ এগৰাকী বিষয়াই উল্লেখ কৰা মতে তিনিমহলীয়া ভৱনটোৰ তলৰ মহলাত জুই লাগিছিল। জুইত নিহত হোৱা ডাঃ ৰবি শংকৰে তেওঁৰ পৰিয়ালৰ সৈতে চিকিৎসালয়ৰ ওপৰৰ মহলাত বাস কৰিছিল।