দুৰ্ঘটনাত আহত শিশুক দেখি চকুপানী ৰখাব নোৱাৰিলে মহিলা আইএএছ বিষয়াই, ভাইৰেল ভিডিঅ’

মানৱতাৰ এতিয়াও অপমৃত্যু হোৱা নাই। তাকেই যেন পুনৰবাৰ প্ৰমাণ কৰিলে এগৰাকী আইএএছ বিষয়াই।শেহতীয়াকৈ এগৰাকী আইএএছ বিষয়াই চেনিটাৰী পেড বিচৰাৰৰ বাবে ছাত্ৰীক ককৰ্থনা কৰাৰ খবৰে দেশত প্ৰতিক্ৰিয়াৰ সৃষ্টি কৰাৰ সময়তে আন এগৰাকী আইএএছ বিষয়াৰ মহানুভৱতাই দেশত বাঃ বাঃ বুটলিছে।

বুধবাৰে উত্তৰ প্ৰদেশৰ লখিমপুৰ জিলাৰ ৭৩০ নং ৰাষ্ট্ৰীয় ঘাইপথত এখন মিনি ট্ৰাক আৰু ব্যক্তিগত বাছৰ সংঘৰ্ষত কমেও দহজন লোক নিহত হোৱাৰ উপৰিও ৪১ জন লোক আহত হৈছিল। লক্ষ্ণৌৰ বিভাগীয় আয়ুক্ত ড০ ৰোশন জেকবে ভুক্তভোগী সকলৰ পৰিয়ালৰ সৈতে বাৰ্তালাপ কৰাৰ সময়ত উচুপি উঠাৰ দৃশ্য ছ’চিয়েল মিডিয়াত ভাইৰেল পৰাৰ পিছতে হৃদয়বান বিষয়া গৰাকীক সকলোৱে প্ৰশংসা কৰিছে।

ভাইৰেল ভিডিঅ’টোত, আমোলাগৰাকীক এগৰাকী মাতৃৰ সৈতে বাৰ্তালাপ কৰি থকা অৱস্থাত তেওঁৰ আঘাতপ্ৰাপ্ত সন্তানৰ অৱস্থা দেখি শোকত ভাগি পৰা দেখা গৈছে। লখিমপুৰ খেৰীৰ মুখ্য চিকিৎসা বিষয়াই কৈছে যে আহতসকলৰ ভিতৰত ১২ জনৰ অৱস্থা সংকটজনক আৰু তেওঁলোকক লক্ষ্ণৌৰ এটা ট্ৰমা চেণ্টাৰলৈ প্ৰেৰণ কৰা হৈছে। এতিয়া ২৯ জন লোক জিলা চিকিৎসালয়ত চিকিৎসাধীন হৈ আছে।

জিলা সদৰৰ পৰা প্ৰায় ৩০ কিলোমিটাৰ দূৰত ৭৩০ নং ৰাষ্ট্ৰীয় ঘাইপথৰ আইৰা দলঙত এই দুৰ্ঘটনাটো সংঘটিত হৈছিল। বাছখনে ধৌৰহাৰাৰ পৰা লক্ষ্ণৌলৈ গৈ আছিল আৰু বিপৰীত দিশৰ পৰা অহা মিনি ট্ৰাকৰ সৈতে খুন্দা মাৰিছিল। ৰাষ্ট্ৰপতি দ্ৰৌপদী মুৰ্মু, প্ৰধানমন্ত্ৰী নৰেন্দ্ৰ মোদী আৰু উত্তৰ প্ৰদেশৰ মুখ্যমন্ত্ৰী যোগী আদিত্যনাথে ঘটনাটোত শোক প্ৰকাশ কৰিছে। ২ লাখ টকা প্ৰতিজন মৃতকৰ নিকটাত্মীয়ক দিয়া হ’ব। আহতসকলক ৫০,০০০ টকা দিয়া হ’ব।