শাসনলৈ আহিলে অগ্নিপথ আঁচনি বাতিল কৰিব কংগ্ৰেছেঃ প্ৰিয়ংকা গান্ধী

ছোনিয়া কন্যা তথা কংগ্ৰেছৰ সাধাৰণ সম্পাদিকা প্ৰিয়ংকা গান্ধীয়ে শুকুৰবাৰে হিমাচল প্ৰদেশৰ এখন জনসভাত কয় যে যদি তেওঁৰ দল কংগ্ৰেছ কেন্দ্ৰত ক্ষমতালৈ আহে তেন্তে অগ্নিপথ সেনা নিযুক্তি আঁচনি বাতিল কৰিব।

প্ৰিয়ংকাই নিৰ্বাচনমুখী হিমাচল প্ৰদেশৰ কাংৰা জিলাত এক ৰেলী সম্বোধন কৰি এই ঘোষণা কৰে। তেওঁ কয় “যেতিয়া কেন্দ্ৰত আমাৰ চৰকাৰ গঠন হ’ব তেতিয়া আমি অগ্নিপথ আঁচনি বাতিল কৰিম। আমি যি প্ৰতিশ্ৰুতি দিওঁ, সেয়া পূৰণ কৰোঁ। ছত্তীশগড়ত, আমি কৃষকৰ ঋণ ৰেহাইৰ প্ৰতিশ্ৰুতি দিছিলো আৰু ইয়াক কাৰ্যকৰী কৰা হৈছে,” ।

কেইবাটাও বিৰোধী দলে উত্থাপন কৰা আপত্তি স্বত্বেও প্ৰতিৰক্ষা মন্ত্ৰালয়ে স্পষ্ট কৰি দিছে যে আঁচনিখন বাতিল কৰা নহ’ব।
কেন্দ্ৰীয় চৰকাৰে দেশৰ প্ৰতিৰক্ষা বিভাগত নিযুক্তিৰ বাবে ঘোষণা কৰা ‘অগ্নিপথ’ যোজনাক কেন্দ্ৰ কৰি সৃষ্টি হোৱা আন্দোলন অতি তীব্ৰতৰ হৈ পৰিছিল। প্ৰথম অৱস্থাত মূলত: বিহাৰ, উত্তৰ প্ৰদেশ, হাৰিয়ানা, পঞ্জাৱ আদি ৰাজ্যত সৃষ্টি হোৱা প্ৰতিবাদ দেশৰ আন আন প্ৰান্ততো মূৰ দাঙি উঠিছিল।

সামৰিক বিভাগত ঠিকাভিত্তিক নিযুক্তিৰ বিৰোধিতাৰে নিযুক্তি প্ৰত্যাশী যুৱ প্ৰজন্মই চৰকাৰৰ এই অগ্নিপথ যোজনাৰ বিৰুদ্ধে সৃষ্টি কৰা এই আন্দোলনে হিংসাত্মক ৰূপ ধাৰণ কৰিছিল।

অগ্নিপথ আঁচনিৰ জৰিয়তে নিযুক্তি লাভ কৰা ১০ শতাংশ অগ্নিবীৰৰ বাবে কেন্দ্ৰীয় সশস্ত্ৰ আৰক্ষী বাহিনীত সংৰক্ষণৰ টোপ ঘোষণা কৰিছে কেন্দ্ৰীয় চৰকাৰে। কিন্তু কেন্দ্ৰৰ এই লোভনীয় টোপত ভুল নগৈ প্ৰতিবাদী যুৱক-যুৱতী সকলে অব্যাহত ৰাখিছিল আন্দোলন।

বিৰোধী দলসমূহে প্ৰতিবাদৰ প্ৰতি সমৰ্থন আগবঢ়াই চৰকাৰৰ অগ্নিপথ আঁচনি বাতিল কৰিবলৈ দাবী জনাই আহিছে।

কংগ্ৰেছৰ সাংসদ ৰাহুল গান্ধীয়েও অগ্নিপথ আন্দোলনলৈ সমৰ্থন আগবঢ়াই বিজেপি নেতৃত্বাধীন চৰকাৰখনক তীক্ষ্ণ বাক্যবাণেৰে আক্ৰমণৰ লক্ষ্য কৰি লৈছিল।