জিমলৈ গ’লেই মহিলাক বিহা হ’ব কঠোৰ শাস্তি! তালিবানে জাৰি কৰিলে নতুন ফটোৱা

মহিলাৰ বাবে এতিয়া আৰু মুঠেও সুৰক্ষিত হৈ থকা নাই আফগানিস্তান। বিশেষকৈ তালিবানে শাসন হস্তগত কৰাৰ পিছতে দেশ খনত মহিলাসকলৰ জীৱন বিপন্ন হৈ পৰিছে। আফগান মহিলাসকলক তালিবানে আনকি খেলা-ধূলা কৰাতো নিষেধাজ্ঞা জাৰি কৰিছে।

শেহতীয়াকৈ তালিবান চৰকাৰে আফগানিস্তানৰ মহিলাসকলৰ বাবে অধিক কঠোৰ ফটোৱা জাৰি কৰিছে। দেশ খনৰ মহিলাসকলক পাৰ্কলৈ যোৱাত বাধা দিয়াৰ পিছত এইবাৰ আফগান মহিলাসকলক জিমলৈ যোৱাৰ ক্ষেত্ৰতো নিষেধাজ্ঞা আৰোপ কৰা হৈছে। যোৱা বছৰৰ পৰা আফগানিস্তানত তালিবান শাসন পুনৰ আৰম্ভ হৈছে। তেতিয়াৰে পৰা সেই দেশৰ মহিলাসকলৰ ওপৰত কেইবাটাও ফটোৱা জাৰি কৰা হৈছে।

তালিবান চৰকাৰৰ মুখপাত্ৰ মহম্মদ আকিফ মোহাজিৰে কয় যে মহিলাসকলৰ জিমলৈ যোৱাৰ ক্ষেত্ৰত জাৰি কৰা নিষেধাজ্ঞা এই সপ্তাহৰ পৰা কাৰ্যকৰী হ’ব। তেওঁ কয় যে তালিবান চৰকাৰে যোৱা ১৫ মাহ ধৰি উদ্যান আৰু জিমত মহিলাৰ প্ৰৱেশৰ ক্ষেত্ৰত নিষেধাজ্ঞা কাৰ্যকৰী কৰিবলৈ চেষ্টা কৰি আছে।

মহিলা আৰু পুৰুষসকলে জিম আৰু পাৰ্কত প্ৰৱেশ কৰাৰ বাবে পৃথক দিন নিৰ্ধাৰণ কৰা হৈছিল। কিন্তু সেই নিয়ম উলংঘা কৰা হৈছে। তেওঁ কয়, “বহু সময়ত আমি পুৰুষ আৰু মহিলাসকলক একেলগে উদ্যানখনত খোজকাঢ়ি থকা দেখিছোঁ। দুৰ্ভাগ্যবশতঃ, কোনো মহিলাই হিজাব পৰিধান কৰা নাই। সেইকাৰণে মহিলাসকলক উদ্যান আৰু জিমত প্ৰৱেশ কৰাত নিষেধাজ্ঞা আৰোপ কৰা হৈছে।” তেওঁ লগতে কয় যে মহিলাসকলে উদ্যান আৰু জিমত প্ৰৱেশ কৰিছে নে নাই সেই বিষয়ত কঠোৰ দৃষ্টি ৰখা হ’ব।

উল্লেখ্য ২০২১ চনত তালিবানে পুনৰ আফগানিস্তান দখল কৰে। তালিবান ক্ষমতালৈ অহাৰ পিছৰে পৰা সেই দেশৰ মহিলাসকলৰ বাবে কেইবাটাও ফটোৱা জাৰী কৰা হৈছে। মহিলাসকলে হিজাব আৰু বোৰ্খা পিন্ধাটো বাধ্যতামূলক কৰা হৈছে। চৰকাৰে দেশৰ উচ্চ প্ৰাথমিক আৰু মাধ্যমিক পৰ্যায়ৰ ছোৱালীৰ বিদ্যালয়সমূহো বন্ধ কৰি দিছে। শেহতীয়াকৈ মহিলাসকলক উদ্যান আৰু জিমলৈ যোৱাৰ ক্ষেত্ৰত যিধৰণৰ নিষেধাজ্ঞা আৰোপ কৰা হৈছে তাকে লৈ সেই দেশৰ মহিলাসকল স্বাভাৱিকতে অসন্তুষ্ট হৈ পৰিছে।