ভাৰতীয় দলত আন এক সংকট: এইবাৰ আঘাতৰ সন্মুখীন ভাৰপ্ৰাপ্ত অধিনায়ক লোকেশ ৰাহুল

বাংলাদেশৰ বিৰুদ্ধে চলিত টেষ্ট শৃংখলাৰ দ্বিতীয়খন টেষ্ট কাইলৈৰ পৰা অনুষ্ঠিত হ’ব। পিছে টেষ্টখনৰ পূৰ্বে আজি আঘাতৰ সমস্যাৰ সন্মুখীন হৈছে ভাৰতীয় দলৰ ভাৰপ্ৰাপ্ত অধিনায়ক লোকেশ ৰাহুল। ঢাকাৰ মিৰপুৰত অনুষ্ঠিত হ’বলগীয়া মেচখনৰ বাবে নেটত অনুশীনলন কৰি থকা অৱস্থাত হাতত আঘাত পাইছে ৰাহুলে।

ভাৰতৰ বেটিং প্ৰশিক্ষক বিক্ৰম ৰাথৌৰে আজি এক সংবাদমেলৰ সময়ত ৰাহুলৰ আঘাত সম্পৰ্কে সদৰী কৰে। বৰ্তমান খেলুৱৈগৰাকীক দলৰ চিকিৎসকে চিকিৎসা কৰি আছে বুলি বেটিং প্ৰশিক্ষক বিক্ৰম ৰাথৌৰে লগতে জানিবলৈ দিয়ে।

সংবাদমেলত ৰাথৌৰে লগতে অৱশ্যে ৰাহুলৰ আঘাত গুৰুতৰ হ’ব নালাগে বুলিও সম্ভাৱনা ব্যক্ত কৰে। নেট অনুশীলনৰ সময়ত ৰাথৌৰে থ্ৰ’ডাউন দি থকাৰ সময়তে ৰাহুলে হাতত আঘাত পায় বুলি জানিব পৰা গৈছে।

উল্লেখ্য যে, আঘাতৰ বাবে ইতিপূৰ্বেই দলৰ পৰা বাদ পৰিবলগীয়া হৈছে নিয়মীয়া অধিনায়ক ৰোহিত শৰ্মা। এদিনীয়া শৃংখলাৰ সময়ত আঙুলিত আঘাত পোৱাৰ বাবে ৰোহিত শৰ্মাই প্ৰথম টেষ্টত অংশ ল’ব পৰা নাছিল। আঘাতৰ পৰা সম্পূৰ্ণ মুক্ত নোহোৱাৰ বাবে দ্বিতীয় টেষ্টটো দলত নাথাকিব ৰোহিত।

এতিয়া যদি ৰাহুলেও আঘাতৰ বাবে দ্বিতীয় টেষ্ট খেলিব নোৱাৰে তেন্তে অধিনায়কৰ দায়িত্ব চম্ভালিব লাগিব চলিত শৃংখলাৰ পূৰ্বে সহ-অধিনায়ক হিচাপে নিৰ্বাচিত হোৱা অভিজ্ঞ বেটাৰ চেতেশ্বৰ পূজাৰাই।

স্মৰ্তব্য যে, বিশ্ব টেষ্ট চেম্পিয়নশ্বিপৰ তালিকাত দ্বিতীয় স্থান সুৰক্ষিত কৰাৰ লগতে ফাইনেলত প্ৰৱেশৰ সম্ভাৱনা জীয়াই ৰখাৰ বাবে ভাৰতে দ্বিতীয়খন টেষ্টত জয়লাভ কৰাটো অতীব প্ৰয়োজন। গতিকে টেষ্টখনত নিশ্চিত জয়ৰ লক্ষ্যৰে অৱতীৰ্ণ হ’ব ভাৰতীয় ক্ৰিকেট দল।