ধোঁৱাচাঙত খোৱাপানী যোগান আঁচনি : জলবৰ্ডক ১৪ দিন সময় দিলে উচ্চ ন্যায়ালয়ে

সমাধান নাই গুৱাহাটী খোৱা পানী সমস্যাৰ। বছৰ বছৰ ধৰি খোৱা পানী যোগান আঁচনিৰ নাম চৰকাৰ কিম্বা জলবৰ্ডে আভুৱা ভাৰি আহিছে। নিয়মীয়াকৈ এটুপি খোৱা পানী পাবৰ বাবে বছৰ বছৰ ধৰি জীয়াতু ভুগি আহিছে গুৱাহাটী মহানগৰৰ অধিকাংশ নাগৰিকে।

তথ্য অনুসৰি গুৱাহাটীত ৭০ শতাংশ মানুহেই খোৱা পানী আঁচনিৰ পৰা বঞ্চিত। গুৱাহাটীৰ ওচৰেৰে মহাবাহু ব্ৰক্ষ্মপুত্ৰ নদীখন বৈ যোৱাৰ পিছতো গুৱাহাটীত খোৱা পানীৰ সমস্যা এক ডাঙৰ সমস্যা । চৰকাৰী পানী যোগান ব্যৱস্থাই এতিয়াও গুৱাহাটীৰ আধাতকৈও অধিক মানুহক খোৱাপানী যোগান ধৰিব পৰা নাই । গুৱাহাটী পৌৰ নিগমৰ তথ্য মতে মহানগৰীৰ মাত্ৰ ৩০ শতাংশ মানুহে চৰকাৰী আঁচনিৰ খোৱা পানী পায় । বাকী ৭০ শতাংশ লোকেই লাভ নকৰে চৰকাৰৰ খোৱা পানী আঁচনিৰ সুবিধা।

দীৰ্ঘদিন ধৰি ভুগি থকা এই সমস্যাৰ বাবেই চিৰিয়াখানা পথ জ্যেষ্ঠ নাগৰিক সন্থাই উচ্চ ন্যায়ালয়ত আবেদন কৰিছিল ৰাজহুৱা স্বাৰ্থজনিত আবেদন। এই আবেদনৰ শুনানিৰ ভিত্তিত জলবৰ্ডে ১৪ দিনৰ ভিতৰত খোৱা পানী আঁচনিৰ কাম-কাজৰ লগতে পানী যোগান আঁচনিৰ পুঁজি সম্পৰ্কতো ন্যায়ালয়ত শপতনামা দাখিল কৰিব লাগিব বুলি নিৰ্দেশ দিছে গুৱাহাটী উচ্চ ন্যায়ালয়ে।

এই গোচৰৰ পৰৱৰ্তী শুনানি হ’ব অহা ৮ ফ্ৰেব্ৰুৱাৰীত। সেইদিনাই ন্যায়ালয়ত জৱাব দিব লাগিব জলবৰ্ডে।

উল্লেখ্য যে ন্যায়ালয়ৰ এই ৰাজহুৱা স্বাৰ্থজনিত গোচৰটোত চিৰিয়াখানা পথ জ্যেষ্ঠ নাগৰিক সন্থা হৈ ন্যায়ালয়ত যুক্তি প্ৰদৰ্শন কৰিছে অধিবক্তা আবিৰ ফুকনে।

প্ৰশ্ন হয়, গুৱাহাটী পানী যোগান আঁচনিৰ নামত অহা কোটি কোটি টকা ক’লৈ যায়। কোটি কোটি টকা খোৱা পানীৰ বাবে আবন্টন হোৱাৰ পিছতো কিয় খোৱা পানীৰ আঁচনিৰ পৰা বঞ্চিত হৈ ৰব লগা হয় গুৱাহাটী মহানগৰীৰ গৰিষ্ঠ সংখ্যক বাসিন্দা? নিচেই কাষেদিয়ে বিশাল ব্ৰহ্মপুত্ৰখন বৈ যোৱাৰ পিছতো কিয় ব্ৰহ্মপুত্ৰৰ পানী ৰাইজৰ উপযোগী হোৱাকৈ সুবিধা কৰি দিব পৰা নাই অসম চৰকাৰে?