হেৰুৱালে লাখ কোটি টকাৰ সম্পত্তি! শ্বেয়াৰ বজাৰত পতন অব্যাহত; কিমান তললৈ নামিল আদানি?

শ্বেয়াৰ বজাৰত আদানি গোষ্ঠীৰ পতন অব্যাহত আছে। ভাৰতৰ শীৰ্ষতম ধনী ব্যক্তি গৌতম আদানিৰ ঔদ্যোগিক গোষ্ঠী নিৰন্তৰ লোকচানৰ সন্মুখীন হৈছে। কোম্পানীটোৱে সোমবাৰে ১ লাখ কোটি টকাৰ শ্বেয়াৰ হেৰুৱাইছে।

সকলো মিলি যোৱা তিনিটা ব্যৱসায়িক ছেচনত (ট্ৰেডিং ছেচন) আদানীয়ে ৫ লাখ ৬০ হাজাৰ কোটি টকাৰ মূলধন হেৰুৱাইছে।

যোৱা বুধবাৰে আদানি গোষ্ঠীৰ দুৰ্যোগ আৰম্ভ হৈছিল। সেইদিনাই আমেৰিকান কোম্পানী হিণ্ডেনবাৰ্গ ৰিচাৰ্চে ভাৰতীয় উদ্যোগ গোষ্ঠীটোৰ বিৰুদ্ধে কেইবাটাও অভিযোগৰ সৈতে এক প্ৰতিবেদন প্ৰকাশ কৰে। কোৱা হৈছিল যে আদানি গোষ্ঠী জালিয়াতি কৰি ধনী হৈছে। শ্বেয়াৰ বজাৰত তেওঁলোকৰ যি স্থিতি তাৰ বেছিভাগেই কৃত্ৰিম।

তেতিয়াৰে পৰা আদানি গোষ্ঠী লোকচানৰ সন্মুখীন হৈছে। তেওঁলোকৰ শ্বেয়াৰবোৰৰ পতন ঘটিছে। মূল্য হ্ৰাস হৈ আছে। দৰাচলতে, হিণ্ডেনবাৰ্গ প্ৰতিবেদনৰ প্ৰভাৱৰ বাবে আদানীয়ে বিশ্বৰ আটাইতকৈ ধনী ব্যক্তিৰ তালিকাত অষ্টম স্থানলৈ নামি আহিছে। এসপ্তাহ আগতে তেওঁ তালিকাৰ তৃতীয় স্থানত আছিল।

বৰ্তমান, আদানিৰ সম্পত্তিৰ মূল্য ৭ লাখ ২০ হাজাৰ কোটি টকা। তেওঁ আন এজন ভাৰতীয় কোটিপতি মুকেশ আম্বানীতকৈ অলপ আগবাঢ়ি আছে। আম্বানী আৰু আদানিৰ সম্পদৰ পাৰ্থক্য হৈছে ৩৩,০০০ কোটি টকা। আম্বানী বৰ্তমান বিশ্বৰ আটাইতকৈ ধনী ব্যক্তিৰ তালিকাত দশম স্থানত আছে।

অৱশ্যে আদানি গোষ্ঠীয়ে হিণ্ডেনবাৰ্গৰ সকলো অভিযোগ অস্বীকাৰ কৰিছে। দেওবাৰে, তেওঁলোকে আমেৰিকান কোম্পানীৰ প্ৰতিবেদনৰ ৪১৩ পৃষ্ঠাৰ প্ৰত্যুত্তৰ লিখিছিল। তাত কোৱা হৈছে যে আদানি গোষ্ঠীৰ বিৰুদ্ধে অভিযোগ ভিত্তিহীন আৰু সম্পূৰ্ণ মিছা।

তদুপৰি, আদানিয়ে অভিযোগ কৰিছে যে হিণ্ডেনবাৰ্গে প্ৰতিবেদন প্ৰকাশ কৰি আদানি গোষ্ঠীক বদনাম কৰি ভাৰতৰ ওপৰত পৰিকল্পিত আক্ৰমণ চলাইছে। কিন্তু আদানি গোষ্ঠীৰ এই উত্তৰেও, শ্বেয়াৰ বজাৰত তেওঁলোকৰ পতন ৰোধ কৰিব পৰা নাই।