বিশাখাপট্টনম হ’ব অন্ধ্ৰ প্ৰদেশৰ ৰাজধানী: ঘোষণা মুখ্যমন্ত্ৰী জগন মোহন ৰেড্ডীৰ

দক্ষিণৰ ৰাজ্য অন্ধ্ৰ প্ৰদেশৰ নতুন ৰাজধানী হ’ব বিশাখাপট্টনম। নতুন ৰাজধানীলৈ অহা মাহতে স্থানান্তৰিত হ’ব মুখ্যমন্ত্ৰী জগন মোহন ৰেড্ডী। আজি মুখ্যমন্ত্ৰীগৰাকীয়ে এক সংবাদমেল যোগে এই ঘোষণা কৰে। ৰেড্ডীৰ ভাষ্যই আপাত দৃষ্টিত লগতে তিনিখন ৰাজধানীৰ পৰিকল্পনা ব্যক্ত কৰিছে।

বিশাখাপট্টনম কাৰ্যবাহীৰ বাবে ৰাজধানী হোৱাৰ বিপৰীতে বিধায়িনী দলৰ বাবে বৰ্তমানৰ ৰাজধানী অমৰাৱতী আৰু ন্যায়পালিকাৰ বাবে কুৰ্ণুল ৰাজধানী হিচাপে পৰিকল্পনা কৰা হৈছে। উল্লেখ্য যে ২০২০ চনতে অন্ধ্ৰ চৰকাৰে এইদৰে তিনিখন ৰাজধানী চহৰৰ পৰিকল্পনা কৰিছিল।

কিন্তু বিগত বৰ্ষত অন্ধ্ৰৰ উচ্চ ন্যায়ালয়ে এই পৰিকল্পনা ৰূপায়ণৰ বাবে আইন প্ৰণয়ন কৰিব নোৱাৰে বুলি ৰায় দিছিল। ৰেড্ডীৰ ৱাই এছ আৰ চি পি চৰকাৰৰ আবেদনৰ ভিত্তিত এই গোচৰটো বৰ্তমান উচ্চতম ন্যায়ালয়ত বিচাৰাধীন হৈ আছে।

অন্ধ্ৰ প্ৰদেশত অহা ৩ আৰু ৪ মাৰ্চত অনুষ্ঠিত হ’বলগীয়া বিশ্ব সন্মিলনৰ বিষয়ে ঘোষণা কৰি আজি মুখ্যমন্ত্ৰী ৰেড্ডীয়ে কয় যে, “মই আপোনালোকক আগন্তুক দিনত আমাৰ ৰাজধানী হ’বলগীয়া বিশাখাপট্টনমলৈ আমন্ত্ৰণ জনাইছো। আগন্তুক মাহত মই নিজেই বিশাখাপট্টনমলৈ স্থানান্তৰিত হ’ম।”

উল্লেখ্য যে ২০১৪ চনত অন্ধ্ৰ প্ৰদেশৰ পৰা বিচ্ছিন্ন হৈ তেলেংগানা গঠন হোৱাৰ পিছত নৱগঠিত তেলেংগানাই হায়দৰাবাদক ৰাজধানী হিচাপে ঘোষণা কৰিছিল। এতিয়া অন্ধ্ৰৰ নৱ ৰাজধানী হিচাপে স্বীকৃত হ’বলগীয়া বিশাখাপট্টনম ৰাজ্যৰখনৰ আটাইতকৈ ডাঙৰ আৰু জনবহুল চহৰ।