ক্ৰিকেট কেৰিয়াৰ শেষ কৰি দিয়াৰ ভাবুকি প্ৰাক্তন পত্নী আয়েশা মুখাৰ্জীৰ! আদালতৰ দ্বাৰস্থ শিখৰ ধাৱান

প্ৰাক্তন পত্নীয়ে তেওঁৰ কেৰিয়াৰ সমাপ্ত কৰাৰ ভাবুকি দিছে। তেওঁৰ সন্মান হানি কৰাৰ চেষ্টা কৰিছে। এনে অভিযোগ লৈ আদালতৰ কাষ চাপিছে শিখৰ ধাৱানে। ভাৰতীয় ক্ৰিকেটাৰজনে প্ৰাক্তন পত্নীক তেওঁৰ বিৰুদ্ধে ছ’চিয়েল মিডিয়াত ভুল তথ্য প্ৰচাৰ নকৰিবলৈ নিৰ্দেশ দিবলৈ অনুৰোধ জনাইছে। আদালতে শিখৰৰ আবেদনৰ প্ৰতি সঁহাৰি দিছে।

যোৱা বছৰ শিখৰৰ পত্নী আয়েশা মুখাৰ্জীৰ সৈতে বিবাহ বিচ্ছেদ হৈছিল। তেতিয়াৰ পৰাই আয়েশাই তেওঁৰ বিৰুদ্ধে এটাৰ পিছত এটাকৈ অপপ্ৰচাৰ চলাই আহিছে বুলি ভাৰতীয় ক্ৰিকেটাৰজনে অভিযোগ কৰে। তেওঁ দিল্লীৰ পাটিয়ালা হাউচ আদালতত এটা অভিযোগ দাখিল কৰিছে।

শিখৰে অভিযোগ কৰিছে যে আয়েশাই তেওঁৰ কেৰিয়াৰ শেষ কৰাৰ ভাবুকি দিছে। আই পি এলত তেওঁৰ দল দিল্লী কেপিটেলছৰ গৰাকী ধিৰাজ মালহোত্ৰাক মেচেজ প্ৰেৰণ কৰিছে। তাত তেওঁ শিখৰৰ নামত মিছা ৰটনা কৰিছে বুলি ক্ৰিকেটাৰজনে অভিযোগ কৰিছে। ইয়াৰ ফলত তেওঁৰ কেৰিয়াৰ শেষ হ’ব পাৰে বুলি শিখৰে আশংকা কৰে।

দিল্লীৰ আদালতৰ ন্যায়াধীশ হৰিশ কুমাৰে শিখৰৰ আবেদনৰ সঁহাৰি দি কয়, “আয়েশাৰ কোনো নিৰ্দিষ্ট অভিযোগ থাকিব পাৰে। সেই অভিযোগ কৰাৰ এটা প্ৰক্ৰিয়া আছে। আয়েশাই বিচাৰিলে আদালতলৈ আহিব পাৰে। কিন্তু কাৰো এনেদৰে সন্মান হানি কৰিব নোৱাৰে।”

ন্যায়াধীশ হৰিশে শিখৰৰ সপক্ষে ৰায় দিছে। তেওঁ কয়, “আয়েশাই শিখৰৰ বন্ধু, আত্মীয় বা সতীৰ্থ কাকো কোনো মেচেজ প্ৰেৰণ কৰিব নোৱাৰিব। তেওঁ সামাজিক মাধ্যমতো একো লিখিব নোৱাৰে। কিয়নো কেৱলমাত্ৰ এজন ব্যক্তিৰ অভিযোগৰ ভিত্তিত কাৰোবাৰ চৰিত্ৰ কলুষিত কৰিব নোৱাৰি।‘’

ন্যায়াধীশগৰাকীয়ে লগতে নিৰ্দেশ দিছে, ‘’ আয়েশাই সংবাদ মাধ্যমত শিখৰৰ বিৰুদ্ধে মুখ খুলিব নোৱাৰিব। কিয়নো বিষয়টো আদালতৰ বিচাৰাধীন। যদি তেওঁৰ কিবা ক’বলৈ আছে, তেওঁ আদালতলৈ আহি ক’ব পাৰে। ইয়াৰ পাছতো, যদি আয়েশাই শিখৰৰ বিৰুদ্ধে মুখ খোলে, তেন্তে আদালতে কঠোৰ ব্যৱস্থা গ্ৰহণ কৰিব।”