কোকৰাঝাৰত অধিবক্তাক এচিড আক্ৰমণ দুৰ্বৃত্তৰ: কঠোৰ ব্যৱস্থাৰ দাবী অধিবক্তা সন্থা

ৰাজ্যত এইবাৰ সংঘটিত হৈছে এচিড আক্ৰমণৰ ঘটনা। দুৰ্বৃত্তৰ এচিড আক্ৰমণৰ বলি হৈ চিকিৎসাধীন হ’বলগীয়া হৈছে এগৰাকী অধিবক্তা। শুকুৰবাৰে নিশা কোকৰাঝাৰ জিলাত সংঘটিত হৈছে এই ঘটনা।

প্ৰকাশিত খবৰ অনুসৰি, গোসাঁইগাঁও উকীল সন্থাৰ জ্যেষ্ঠ অধিবক্তা তথা গোসাঁইগাঁৱৰ পদ্মবিল গাঁৱৰ বাসিন্দা আব্দুছ ছামাদ আহমেদক ঘৰতে দুষ্কৃতিকাৰীয়ে এচিড আক্ৰমণ কৰে।

এই আক্ৰমণৰ পাছতে ততাতৈয়াকৈ তেওঁক আৰ এন বি অসামৰিক চিকিৎসালয়লৈ লৈ যোৱা হয় যদিও পিছত স্বাস্থ্যৰ অধিক অৱনতি ঘটাত তেওঁক উন্নত চিকিৎসাৰ বাবে গুৱাহাটী চিকিৎসা মহাবিদ্যালয়লৈ প্ৰেৰণ কৰা হয়।

ইতিমধ্যে ঘটনা সন্দৰ্ভত স্থানীয় আৰক্ষী থানাত এটা গোচৰ ৰুজু কৰা হৈছে বুলি পৰিয়ালৰ লোকে জানিবলৈ দিছে।

আনহাতে অধিবক্তা গৰাকীৰ পৰিয়ালৰ এজাহাৰৰ ভিত্তিত তদন্ত আৰম্ভ কৰা হৈছে বুলি স্থানীয় এগৰাকী আৰক্ষী বিষয়াই সদৰী কৰিছে।

অধিবক্তা আব্দুছ ছামাদ আহমেদৰ ওপৰত এই আক্ৰমণৰ পাছতে অধিবক্তা সন্থাই দুৰ্বৃত্তৰ বিৰুদ্ধে কঠোৰ ব্যৱস্থা ল’বলৈ আৰক্ষীক আহ্বান জনাইছে।