চৰকাৰৰ নতুন পদক্ষেপ, প্ৰতিটো অভিযোগৰে সঁহাৰি দিব লাগিব ছ’চিয়েল মিডিয়াৰ প্ৰতিষ্ঠানে

শেহতীয়াকৈ কেন্দ্ৰীয় চৰকাৰে Grievance Appellate Committee চমুকৈ GAC গঠন কৰিছে যিয়ে এতিয়াৰ পৰা ছ’চিয়েল মিডিয়া কোম্পানীসমূহৰ ওপৰত অধিক চকু ৰাখিব।

সংবাদ মাধ্যমৰ বাতৰি অনুসৰি, চৰকাৰে ছ’চিয়েল মিডিয়া প্লেটফৰ্মৰ বিৰুদ্ধে ব্যৱহাৰকাৰীৰ অভিযোগৰ সঁহাৰি দি ইয়াৰ প্ৰতিকাৰৰ বাবে এই মঞ্চ প্ৰস্তুত কৰিছে। মংগলবাৰে এই মঞ্চ অৰ্থাৎ GAC মুকলি কৰা হয়।

ইলেক্ট্ৰনিকছ আৰু তথ্য প্ৰযুক্তি বিভাগৰ ৰাজ্যিক মন্ত্ৰী ৰাজীৱ চন্দ্ৰশেখৰে মঙলবাৰে কয় যে এই পৰ্টেলৰ জৰিয়তে চৰকাৰে গ্ৰাহকক এনে এক মঞ্চ প্ৰদান কৰিবলৈ চেষ্টা কৰিছে, য’ত ছ’চিয়েল মিডিয়া চাইটৰ সৈতে জড়িত প্ৰতিটো সমস্যা সমাধান কৰিব পৰা যাব বা অভিযোগ পঞ্জীয়ন কৰিব পৰা যাব।

ছ’চিয়েল মিডিয়াত সন্মুখীন হোৱা সমস্যা সমাধানৰ বাবে ইতিমধ্যে ‘ইলেক্ট্ৰনিকছ আৰু তথ্য প্ৰযুক্তি মন্ত্ৰালয়’ (MeitY)ই ৩খন সমিতি গঠন কৰিছে।

এই পৰ্টেলে ছ’চিয়েল মিডিয়া সম্পৰ্কীয় অভিযোগ সংগ্ৰহ কৰি আপীল ন্যায়াধিকৰণলৈ প্ৰেৰণ কৰিব।

ফেচবুক, টুইটাৰ আৰু ইনষ্টাগ্ৰামৰ দৰে সকলো সুপৰিচিত ছ’চিয়েল মিডিয়া কোম্পানী এই পৰ্টেলত অন্তৰ্ভুক্ত কৰা হ’ব যাতে এই কোম্পানীসমূহে ব্যৱহাৰকাৰীসকলৰ অভিযোগসমূহৰ সঁহাৰি দিয়াৰ লগতে সমাধান কৰিবলৈ বাধ্য হয়। এই পৰ্টেলত অভিযোগকাৰীৰ অভিযোগৰ উত্তৰো দিব লাগিব সংশ্লিষ্ট ছ’চিয়েল মিডিয়াৰ চাইটসমূহে।