গুৱাহাটী ৰে’ল ষ্টেচনত ২০ লাখ টকা মূল্যৰ সোণ জব্দ: সৰবৰাহকাৰীক গ্ৰেপ্তাৰ

গুৱাহাটী ৰে’ল ষ্টেচনত আজি ৰে’লৱে আৰক্ষীয়ে জব্দ কৰিছে চোৰাংকৈ সৰবৰাহ কৰা লক্ষাধিক টকা মূল্যৰ সোণ। এগৰাকী সন্দেহযুক্ত সৰবৰাহকাৰীৰ পৰা এই সোণখিনি জব্দ কৰিছে আৰক্ষীয়ে।

ৰে’লৱে আৰক্ষীয়ে লগতে সোণখিনি সৰবৰাহ কৰা ব্যক্তিগৰাকীকো গ্ৰেপ্তাৰ কৰে। ধৃত ব্যক্তিগৰাকীক চম্পত ৰাও বুলি চিনাক্ত কৰা হৈছে।

চোৰাংচোৱাৰ তথ্যৰ ভিত্তিত অভিযান চলাই ৰে’লৱে আৰক্ষীৰ দলটোৱে ব্যক্তিগৰাকীক আটক কৰি সোণখিনি জব্দ কৰে।

প্ৰায় ৩২০ গ্ৰাম ওজনৰ সোণখিনিৰ মূল্য প্ৰায় ২০ লাখ টকা হ’ব বুলি অনুমান কৰা হৈছে।

ধৃত চম্পত ৰাৱে সোণখিনি দিল্লীলৈ নিয়াৰ পৰিকল্পনা কৰিছিল বুলি জানিব পৰা গৈছে।

চলিত মাহত গুৱাহাটী ৰে’ল ষ্টেচনত আজিৰ সৈতে দ্বিতীয়বাৰ এইদৰে সোণৰ সৰবৰাহৰ ঘটনা পোহৰলৈ আহিছে।

যোৱা সপ্তাহত মহানগৰ আৰক্ষীয়ে প্ৰায় ৬০ লাখ টকা মূল্যৰ সোণৰ সৈতে দুগৰাকী ব্যক্তিক গ্ৰেপ্তাৰ কৰিছিল।

ধৃত ব্যক্তি দুগৰাকীয়ে সোণখিনি বিক্ৰীৰ বাবে মণিপুৰৰ পৰা দিল্লীলৈ লৈ যোৱাৰ পৰিকল্পনা কৰিছিল।