বাৰানসী অভিমুখী বিমানত অঘটন : কথমপি প্ৰাণৰক্ষা ১৩৬ গৰাকী যাত্ৰীৰ

বিমানৰ যান্ত্ৰিক বিজুতিৰ বাবে কথমপি প্ৰাণৰক্ষা পৰে ১৩৬ জন যাত্ৰীৰ। মঙলবাৰে বাৰানসী অভিমুখী এখন বিমানত হোৱা যান্ত্ৰিক বিজুতিৰ বাবে পাইলটে হায়দৰাবাদতে জৰুৰীকালীনভাবে বিমানখন অৱতৰণ কৰিবলৈ বাধ্য হয়। পাইলটৰ তাৎক্ষণিক ব্যৱস্থাৰ বাবে বিমানখনৰ সকলো যাত্ৰী সুৰক্ষিত অৱস্থাত অৱতৰণ কৰিবলৈ সক্ষম হয়।

অসামৰিক বিমান পৰিবহণ সঞ্চালকালয়ে জনোৱা মতে, বাৰানসী অভিমুখী বিমানখন যান্ত্ৰিক বিজুতিৰ বাবে গন্তব্য স্থান পোৱাৰ পূৰ্বেই অন্য বিমানবন্দৰলৈ স্থানান্তৰিত কৰিবলগীয়া হৈছিল।

মঙলবাৰে পুৱা বেংগালুৰুৰ পৰা বাৰানসীলৈ ৰাওনা হয় ইণ্ডিগ’ৰ ৬E897 বিমানখন। কিন্তু কিছু সময় আকাশত উৰাৰ পাছতেই পাইলটে এটা যান্ত্ৰিক সমস্যা লক্ষ্য কৰে।

পাইলটে খৰখেদাকৈ বিমানখন অৱতৰণ কৰাৰ সিদ্ধান্ত গ্ৰহণ কৰে। বিমানখনৰ নিকটতম হায়দৰাবাদ বিমানবন্দৰ কৰ্তৃপক্ষৰ সৈতে যোগাযোগ কৰা হয়। আৰু পুৱা প্ৰায় ৬:১৫ বজাত হায়দৰাবাদত নিৰাপদভাবে বিমানবন্দৰত অৱতৰণ কৰে বিমানখনে।

ইতিমধ্যে বাৰানসীলৈ যাবৰ বাবে যাত্ৰীসকলৰ বাবে বিকল্প ব্যৱস্থা কৰা হৈছে।

ইণ্ডিগৰ কৰ্তৃপক্ষই জনোৱা মতে, বিমানখনৰ কি বিজুতি আছিল, যাত্ৰীসকলক কিয় এই হাৰাশাস্তিৰ সন্মুখীন হ’বলগীয়া হ’ল সেই বিষয়ে তদন্ত কৰা হ’ব।