আমেৰিকাৰ টেক্সাছৰ শ্বপিং মলত গুলীচালনাৰ ঘটনাত ৯ জন নিহত; বন্দুকধাৰীক গুলীয়াই হত্যা আৰক্ষীৰ

আমেৰিকা যুক্তৰাষ্ট্ৰ টেক্সাছত আন এক বন্দুকধাৰীৰ আক্ৰমণৰ ঘটনা  সংঘটিত হৈছে। এইবাৰ এটা শ্বপিং মলত আক্ৰমণ চলালে বন্দুকধাৰীয়ে। বন্দুকধাৰীৰ নিৰ্বিচাৰ গুলীচালনাত কমেও ৯ জন লোকে প্ৰাণ হেৰুৱায়। বহু লোক আহত হয়। আৰক্ষীৰ গুলীত মৃত্যু হয় বন্দুকধাৰীজনৰ।

শনিবাৰে নিশা সংঘটিত হয় এই ঘটনা। টেক্সাছৰ ডালাছৰ এটা জনপ্ৰিয় শ্বপিং মলত সেই সময়ত বহুতে বজাৰ কৰাত ব্যস্ত আছিল। হঠাতে বন্দুকধাৰীৰ গুলীচালনা আৰম্ভ হয়। হত্যাকাৰী যুৱকজনৰ গুলীচালনাত ১৬ জন লোক গুৰুতৰভাৱে আহত হয়।

লগতে পঢ়ক: খাদ্য-সামগ্ৰী, দৰৱ ক্ৰয়ৰ বাবে চুৰাচান্দপুৰত ৩ ঘণ্টাৰ বাবে কাৰ্ফিউ প্ৰত্যাহাৰ; এতিয়াও স্তব্ধ মণিপুৰ

গুলীচালনাৰ তথ্য লাভ কৰি অগ্নিনিৰ্বাপক বাহিনী আৰু আৰক্ষী ঘটনাস্থলীত উপস্থিত হয়। আহতসকলক উদ্ধাৰ কৰি চিকিৎসালয়লৈ লৈ যোৱা হয়। চিকিৎসালয়ত চিকিৎসাৰ সময়ত ৯ জন লোকৰ মৃত্যু ঘটে।

নিহতসকলৰ ভিতৰত এটা ৫ বছৰীয়া শিশুও আছে। বাকী আহতসকল এতিয়াও চিকিৎসাধীন হৈ আছে।

লগতে পঢ়ক: তোলনীয়া কন্যাক অমানুষিক নিৰ্যাতন চলোৱা মনোৰোগ বিশেষজ্ঞ ডাঃ সংগীতা দত্তক গ্ৰেপ্তাৰ

সংবাদমেলযোগে আৰক্ষীয়ে জনোৱা মতে, বন্দুকধাৰীজনে অকলেই শ্বপিং মলটোত আক্ৰমণ চলাইছিল। ইয়াৰ পিছতে হত্যাকাৰী যুৱকৰ ওপৰত গুলীচালনা কৰে আৰক্ষীয়ে। গুলীবিদ্ধ হৈ থিতাতে তেওঁৰ মৃত্যু হয়। ব্যস্ত শ্বপিং মলটোত আক্ৰমণৰ আঁৰৰ উদ্দেশ্য সন্দৰ্ভত আৰক্ষীয়ে তদন্ত আৰম্ভ কৰিছে।