ব্ৰিটেইনৰ পাছত এইবাৰ আমেৰিকালৈ ৰাহুল গান্ধী : প্ৰদান কৰিব একাধিক ভাষণ

কংগ্ৰেছ নেতা তথা ৱায়ানাদৰ প্ৰাক্তন সাংসদ ৰাহুল গান্ধীয়ে ৩১ মে’ৰ পৰা ১০ দিনীয়া আমেৰিকা ভ্ৰমণ  কৰিব। এই সময়ছোৱাত তেওঁ নিউয়ৰ্কৰ মেডিচন স্কোৱাৰ গাৰ্ডেনত প্ৰায় ৫ হাজাৰ প্ৰবাসী ভাৰতীয়ৰ এক সমাৱেশ অনুষ্ঠিত কৰাৰ লগতে ৱাশ্বিংটনত পেনেল আলোচনাতো অংশগ্ৰহণ কৰিব।

ইয়াৰ উপৰিও গান্ধীয়ে কেলিফৰ্ণিয়াৰ ষ্টেনফৰ্ড বিশ্ববিদ্যালয়ত ভাষণ প্ৰদান কৰিব। কংগ্ৰেছ নেতাগৰাকীয়ে তাৰ ৰাজনীতিবিদ আৰু উদ্যোগীসকলকো সাক্ষাৎ কৰাৰ কথা।

উল্লেখ্য, ইয়াৰ পূৰ্বে ৰাহুল গান্ধীয়ে ব্ৰিটেইন ভ্ৰমণ কৰিছিল। সেই ভ্ৰমণ ৰাহুল গান্ধীয়ে কেম্ব্ৰিজ বিশ্ববিদ্যালয়ৰ লগতে ব্ৰিটিছ সংসদতো ভাষণ প্ৰদান কৰিছিল। দুয়োটা ভাষণতে মোদী চৰকাৰ তীব্ৰ ভাষাৰে সমালোচনা কৰাৰ লগতে মোদীৰ আমোলত ভাৰতীয় গণতন্ত্ৰ সংকটাপন্ন বুলিও মন্তব্য কৰিছিল ৰাহুল গান্ধীয়ে।

ৰাহুল গান্ধীৰ সেই ভাষণে দেশৰ ৰাজনীতিত তোলপাৰ লগোৱাই নহয় শাসকীয় বিজেপিৰ মন্ত্ৰীয়ে বিদেশৰ ওভতি অহাৰ পাছতে ৰাহুল গান্ধীক নিচৰ্ত ক্ষমা খোজাৰ লগতে গ্ৰেপ্তাৰৰো দাবী কৰিছিল।

চলিত বৰ্ষৰ মাৰ্চ মাহত ৰাহুল গান্ধীয়ে কেম্ব্ৰিজ বিশ্ববিদ্যালয়ত, লণ্ডনত এছ’চিয়েশ্যন অৱ জাৰ্নেলিষ্টৰ উদ্যোগত আয়োজিত এক অধিৱেশনত আৰু শেষত লণ্ডনৰ চাথাম হাউছ থিংক টেংকত হোৱা কথোপকথনত অংশগ্ৰহণ কৰিছিল।

ব্ৰিটেইনৰ পৰা ওভতি অহাৰ পাছতে গুজৰাটৰ চুৰাটৰ মুখ্য দণ্ডাধীশৰ আদালতে মোদী উপাধি বিতৰ্কৰ গোচৰ দোষী সাব্যস্ত কৰি ৰাহুল গান্ধীক দুবছৰৰ কাৰাদণ্ডৰ শাস্তি দিয়ে আৰু ইয়াৰ গইনা লৈয়ে কংগ্ৰেছ সাংসদগৰাকীৰ সাংসদ পদ খাৰিজ কৰে লোকসভাৰ সচিবালয়ে।

সাংসদ পদ হেৰুওৱাৰ পাছত ৰাহুল গান্ধীয়ে মোদী চৰকাৰৰ বিৰুদ্ধে অধিক আক্ৰমণাত্মক হৈ পৰে আৰু সন্মুখৰ পৰা কংগ্ৰেছক নেতৃত্ব প্ৰদান কৰি কৰ্ণাটক বিধানসভাত শাসকীয় বিজেপিক শোচনীয়ভাৱে পৰাস্ত কৰে। এনে সময়তে কংগ্ৰেছ নেতাগৰাকীলৈ মাৰ্কিন যুক্তৰাষ্ট্ৰৰ পৰা নিমন্ত্ৰণ আহিছে।

আনহাতে, ২২ জুনত প্ৰধানমন্ত্ৰী নৰেন্দ্ৰ মোদীয়ে আমেৰিকালৈ যাত্ৰা কৰাৰ কথা। প্ৰধানমন্ত্ৰী মোদীয়ে আমেৰিকাৰ ৰাষ্ট্ৰপতি জো বাইডেন আৰু ফাৰ্ষ্ট লেডী জিল বাইডেনে হোৱাইট হাউছত অনুষ্ঠিত হ’বলগীয়া এক নৈশ ভোজত আতিথ্য গ্ৰহণ কৰিব।