মোগল যুগৰ পিছত এইবাৰ পাঠ্যক্ৰমৰ পৰা বাদ পৰিব ‘চাৰে জাহা ছে আচ্ছা’ খ্যাত ইকবাল!

দিল্লী বিশ্ববিদ্যালয়ৰ একাডেমিক কাউন্সিলে শুকুৰবাৰে স্নাতক স্তৰৰ ৰাজনীতি বিজ্ঞানৰ পাঠ্যক্ৰমৰ পৰা ‘চাৰে জাঁহা ছে আচ্ছা, হিন্দুস্তান হামাৰা’ৰ স্ৰষ্টা মহম্মদ ইকবালৰ জীৱনী বাদ দিয়াৰ সিদ্ধান্ত গ্ৰহণ কৰে।

উল্লেখ্য যে ‘আধুনিক ভাৰতীয় ৰাজনৈতিক চিন্তা’ (Modern Indian political thougt) শীৰ্ষক অধ্যায়টো দিল্লী বিশ্ববিদ্যালয়ৰ বি এৰ ষষ্ঠ ষান্মাসিকৰ অংশ আছিল। ইয়াত প্ৰয়াত উৰ্দু কবিৰ জীৱনী আৰু সাহিত্যিমূলক ৰচনাৰ ওপৰত ‘ইকবাল: কমিউনিটি’ অধ্যায়টো সন্নিবিষ্ট কৰা হৈছিল।

লগতে পঢ়ক: মাজ আকাশত বিমানৰ জৰুৰীকালীন দুৱাৰ খুলি মাতি আনিছিল ভয়ংকৰ বিপদ; গ্ৰেপ্তাৰ সেই যাত্ৰী

দিল্লী বিশ্ববিদ্যালয়ৰ একাডেমিক কাউন্সিলে গভৰ্নিং কাউন্সিলক ইয়াক বাদ দিয়াৰ পৰামৰ্শ দিছে। কেন্দ্ৰীয় চৰকাৰৰ নিয়ন্ত্ৰিত বিশ্ববিদ্যালয়খনৰ গভৰ্নিং কাউন্সিলে এই সন্দৰ্ভত চূড়ান্ত সিদ্ধান্ত গ্ৰহণ কৰিব।

ইয়াৰ পূৰ্বে মোগল যুগ পাঠ্যক্ৰমৰ পৰা বাদ গৈছিল। এতিয়া মোডী চৰকাৰে উৰ্দু কবিক পাঠ্যক্ৰমৰ পৰা বাদ দিব বিচাৰিছে। অৱশ্যে ষষ্ঠ ষান্মাসিকৰ পাঠ্যক্ৰমত থাকি গৈছে ৰামমোহন ৰায়, পণ্ডিতা ৰমাবাই, স্বামী বিবেকানন্দ, মহাত্মা গান্ধী আৰু বি আৰ আম্বেদকাৰ।

ইকবালৰ জন্ম হৈছিল ১৮৭৭ চনত অবিভক্ত ভাৰতৰ শিয়ালকোটত (বৰ্তমান পাকিস্তানত)। ১৯৩৮ চনত তেওঁৰ মৃত্যু হয়। পাকিস্তানে তেওঁক জাতীয় কবিৰ মৰ্যাদা দিছে। দুয়োখন দেশতে তেওঁ জনপ্ৰিয়।

লগতে পঢ়ক: কি যে হ’ব! জলাশয়ত পৰিল বিষয়াৰ দামী ফোন; উদ্ধাৰৰ বাবে সিঁচি পেলোৱা হ’ল ২১ লাখ লিটাৰ পানী

প্ৰসংগক্ৰমে, চলিত শিক্ষাবৰ্ষৰ পৰা কেন্দ্ৰীয় শিক্ষা মন্ত্ৰালয়ৰ নিয়ন্ত্ৰিত চিবিএছইৰ দ্বাদশ শ্ৰেণীৰ ইতিহাসৰ পাঠ্যক্ৰমৰ পৰা মোগল যুগ বাদ পৰিছে। এইবাৰ ইকবাল বাদ পৰিবলৈ গৈ আছে!