বিহুনাচত অনন্য কৃতিত্ব , উজলিল অভিলাষা শইকীয়া

লখিমপুৰ জিলাৰ তাতিবাহাৰস্থিত দেৰগঞা গাঁৱৰ কণমানি নৃত্যশিল্পী অভিলাষা শইকীয়া (গুণগুণ) জিলিকি উঠিছে তেওঁৰ অনন্য নৃত্য প্ৰতিভাৰে। ধলপুৰ প্ৰাথমিক বিদ্যালয়ৰ পঞ্চম শ্ৰেণীত অধ্যয়নৰত নবছৰীয়া অভিলাষাই বিগত ব’হাগৰ বিহু প্ৰতিযোগিতাসমূহৰ ‘মৌ-বিহুৱতী’ শিতানৰ লগতে বিভিন্ন মঞ্চত এককভাৱে দুকুৰিৰ অধিক খিতাপ অৰ্জন কৰি অঞ্চলবাসীৰ আশীষ আৰু দৃষ্টি আকৰ্ষণ কৰিবলৈ সক্ষম হৈছে।

প্ৰচুৰ সম্ভাৱনা তথা প্ৰতিভাসম্পন্ন কণমানি গৰাকীৰ স্থান লাভৰ ঈৰ্ষনীয় তালিকাখন ক্ৰমে জ্ঞানোদয় কৃষ্টি বিকাশ কেন্দ্ৰ বিছাবৰি ব’হাগ বিহু সন্মিলন, তাতিবাহাৰ সন্মিলিত যুৱ সমাজৰ ব’হাগ বিহু সন্মিলন, জিজ্ঞাসা যুৱমঞ্চ কাছমাৰিৰ ব’হাগ বিহু সন্মিলনত প্ৰথম স্থান, দেৰগঞা, পূব ডিক্ৰং বিহপুৰীয়া, কলাবাৰীৰ দ’লগুৰি কেন্দ্ৰীয় ৰঙালী বিহু সন্মিলন, ১নং বৰপথাৰত দ্বিতীয় স্থান আৰু ভোগপুৰ, পিছলা, চৰাইদলনী ব’হাগী বিহু সন্মিলনত  তৃতীয় স্থান।

সমান্তৰালভাৱে জ্ঞানজ্যোতি যুৱসংঘ চৰাইদলনী, মেগা এক্সপ’ নাৰায়ণপুৰ আৰু অল আসাম চিংগিংষ্টাৰ-২০২৩ বৰ্ষত সৃষ্টিশীল আধুনিক নৃত্য শিতানত তেওঁ লাভ কৰিছে প্ৰথম স্থান। তদুপৰি ভিন্ন সৌন্দৰ্য প্ৰতিযোগিতাত স্থান প্ৰাপ্ত অভিলাষা শইকীয়াই আসাম টকচ্‌ চেনেলে অহা জুলাই মাহত অনুষ্ঠিত কৰিবলগীয়া মাল্টিটেলেণ্ট টিভি ৰিয়েলিটি শ্ব’ৰ ‘আসাম টেলেণ্ট হাণ্ট চিজন-১’ৰ বাবে নিৰ্বাচিত হৈছে।

নাৰায়ণপুৰস্থিত ইমন সংগীত বিদ্যালয়ত সৃষ্টিশীল নৃত্যৰ লগতে অভিলাষাই সত্ৰীয়া, বিহুনাচ আদিৰ প্ৰশিক্ষণ গ্ৰহণ কৰি আছে ব্যক্তিগত প্ৰশিক্ষক ৰঞ্জন শইকীয়াৰ পৰা।

উল্লেখ্য নৃত্যাভিলাষী-সফল সৌন্দৰ্য প্ৰতিযোগী আৰু মেধাৱী ছাত্ৰী অভিলাষা ধলপুৰ চৰকাৰী মজলীয়া বিদ্যালয়ৰ সহ:শিক্ষক পুলিন শইকীয়া আৰু মাতৃ ঊষামণি বৰুৱা শইকীয়াৰ দ্বিতীয় কন্যা। নিজৰ চেষ্টা-একাগ্ৰতাৰ ফলত সফল হোৱা তথা পিতৃ-মাতৃৰ তত্ত্বাৱধানেৰে চৰকাৰী বিদ্যালয়ৰ পৰিৱেশত শিক্ষা গ্ৰহণ কৰা অভিলাষা শইকীয়াৰ উজ্জ্বল ভৱিষ্যৎ কামনা কৰিছে বিদ্বৎ মহলে।