আন্তঃৰাষ্ট্ৰীয় টি-২০ ক্ৰিকেটৰ পৰা অৱসৰ তাৰকা ক্ৰিকেটাৰ মিতালী ৰাজেৰ

ভাৰতীয় মহিলা ক্ৰিকেট ইতিহাসৰ বৰ্তমানলৈ আটাইতকৈ সফল আৰু প্ৰভাৱী ক্ৰিকেটাৰ তথা ভাৰতীয় মহিলা এদিনীয়া দলৰ অধিনায়ক মিতালী ৰাজে আজি অনুষ্ঠানিকভাৱে আন্তঃৰাষ্ট্ৰীয় টি-২০ ক্ৰিকেটৰ পৰা অৱসৰ ঘোষণা কৰে।

মিতালীয়ে ৮৯ খন টি-২০ আন্তঃৰাষ্ট্ৰীয় ক্ৰিকেট খেলত অংশগ্ৰহণ কৰি ১৭ টা অৰ্ধশতকসহ মুঠ ২৩৬৪ ৰাণ কৰিবলৈ সক্ষম হৈছে।

ভাৰতীয় মহিলা ক্ৰিকেট দলক মুঠ ৩২ খন টি-২০ খেলত নেতৃত্ব প্ৰদান কৰা ৰাজেৰ নেতৃত্বতে হৰমনপ্ৰীত সিং, স্মৃতি মন্ধনা, দিপ্তী শৰ্মা আদিৰ দৰে তাৰকা খেলুৱৈৰ ভাৰতীয় ক্ৰিকেট দলত অভিষেক ঘটে।

আনহাতে, ২০০৬ চনত প্ৰথমবাৰৰ বাবে ভাৰতে টি-২০ মহিলা বিশ্বকাপত অংশগ্ৰহণ কৰাৰ সময়তো মিতালীয়ে দলৰ নেতৃত্বত আছিল।

সংবাদ মাধ্যমৰ আগত আন্তঃৰাষ্ট্ৰীয় টি-২০ ক্ৰিকেটৰ পৰা অৱসৰৰ কথা ঘোষণা কৰি মিতালীয়ে ২০২১ চনত অনুষ্ঠিত হ’বলগীয়া এদিনীয়া বিশ্বকাপৰ বাবে নিজকে প্ৰস্তুত কৰাৰ কাৰণেই এই সিদ্ধান্ত লোৱা বুলি উল্লেখ কৰে।

উল্লেখযোগ্য যে, ২০১৮ চনৰ মহিলা টি-২০ বিশ্বকাপৰ ছেমিফাইনেলৰ পৰা মিতালী ৰাজক আকস্মিকভাৱে দলৰ পৰা বাদ দিয়া হৈছিল।

মিতালী দলৰ পৰা বাদ পৰা সন্দৰ্ভত অধিনায়ক হৰমনপ্ৰীত কৌৰে যুৱ খেলুৱৈক অধিক সুযোগ প্ৰদান কৰাৰ লক্ষ্যৰে সেই সিদ্ধান্ত লোৱা হৈছিল বুলি উল্লেখ কৰিছিল।