দিল্লীত গৃহমন্ত্ৰী শ্বাহৰ বাসগৃহৰ বাহিৰত প্ৰতিবাদ মণিপুৰৰ জনজাতীয় লোকৰ

কেন্দ্ৰীয় গৃহমন্ত্ৰী অমিত শ্বাহৰ দিল্লীস্থিত বাসগৃহৰ বাহিৰত আজি প্ৰতিবাদ সাব্যস্ত কৰে মণিপুৰৰ কিছু জনজাতীয় লোকে। দিল্লীত বসবাস কৰি অহা মণিপুৰৰ কুকি-জোমি-হ্মাৰ-মিজো জনজাতিৰ আছিল প্ৰতিবাদকাৰীসকল।

অশান্তজৰ্জৰ মণিপুৰত অতি সোনকালে শান্তি ঘূৰাই অনাৰ লগতে মণিপুৰৰ জনজাতীয় লোকসকলৰ নিৰাপত্তাৰ দাবীত প্ৰতিবাদ সাব্যস্ত কৰে জনজাতীয় লোকসকলে।

জনজাতীয় প্ৰতিবাদকাৰীসকলে আজি পুৱা এক সমদল উলিয়াই কেন্দ্ৰীয় গৃহমন্ত্ৰীগৰাকীৰ ঘৰৰ বাহিৰত বিক্ষোভ প্ৰদৰ্শন কৰে আৰু তেওঁৰ সৈতে বৈঠকত মিলিত হোৱাৰ দাবী জনায়।

ইয়াৰ পিছতে গৃহমন্ত্ৰী শ্বাহৰ বাসগৃহৰ বাহিৰত নিৰাপত্তা বৃদ্ধি কৰা হয়। পিছত অৱশ্যে কেন্দ্রীয় গৃহমন্ত্রীগৰাকীয়ে জনজাতীয় প্রতিনিধিৰ কিছুসংখ্যক প্রতিনিধিক সাক্ষাৎ কৰে৷

প্ৰতিবাদকাৰীসকলে কেন্দ্ৰীয় গৃহমন্ত্ৰীক তিনি দফীয়া দাবীৰ চনদ দাখিল কৰা বুলি জানিব পৰা গৈছে।

উল্লেখ্য যে, ৰাজ্যখনৰ দুটা সম্প্ৰদায়ৰ মাজত সৃষ্টি হোৱা সংঘৰ্ষ আৰু তাৰ পিছতে ভয়াৱহ ৰূপত বৃদ্ধি পোৱা হিংসাত্মক পৰিস্থিতিৰ ফলস্বৰূপে যোৱা ৩ মে’ৰ পৰা মণিপুৰ উত্তপ্ত হৈ পৰিছে।

ৰাজ্যখনত এনে হিংসাত্মক পৰিস্থিতিৰ পৰিপ্ৰেক্ষিতত প্ৰায় ১০০ জন লোকে প্ৰাণ হেৰুওৱাৰ লগতে হাজাৰ হাজাৰ লোক ক্ষতিগ্ৰস্ত হৈছে।