ধাৰাসাৰ বৰষুণত উত্তৰ ছিকিমৰ পথত খহনীয়া, বিচ্ছিন্ন যোগাযোগ; আৱদ্ধ প্ৰায় ২হাজাৰ পৰ্যটক

উত্তৰ ছিকিমত ধাৰাবাহিকভাৱে হোৱা ধাৰাসাৰ বৰষুণৰ ফলত বিপৰ্যস্ত হৈ পৰিছে। কেইবাটাও পথ খহি পৰাৰ ফলত কমেও ২হাজাৰ পৰ্যটক আৱদ্ধ হৈ আছে। ঘৰলৈ কেনেকৈ উভতিব সেই  চিন্তাতে সময় কটাইছে।

ইতিমধ্যে উত্তৰ ছিকিমত বৰ্ষা নামিছে। যাৰ বাবে নিশাৰ ভিতৰত হোৱা ধাৰাসাৰ বৰষুণৰ ফলত কেইবাখনো পাহাৰীয়া নদী ওফন্দি উঠিছে। সেই পানীত ডুবিছে ৰাস্তাবোৰ। কেইবা ঠাইতো ভূমিস্খলন ঘটিছে।

১০ নং ৰাষ্ট্ৰীয় ঘাইপথত খহনীয়া হোৱাৰ বাবে লাচুং, লাচেন, ইউমথাঙৰ সৈতে পথ যোগাযোগ বিচ্ছিন্ন হৈ পৰিছে। পেগঙৰ সমীপতো খহনীয়াৰ বাবে পথ অৱৰোধ হৈ পৰিছে। জানিব পৰা মতে, মানগনৰ পৰা চুংথাংলৈ যোৱা পথটো সদ্যহতে সম্পূৰ্ণৰূপে বন্ধ হৈ আছে। চাংগুৰ নাথুলা পথত যোৱাত নিষেধাজ্ঞা জাৰি কৰা হৈছে। কমেও ২০০০ পৰ্যটক এই ভয়াবহ পৰিস্থিতিত আৱদ্ধ হৈ আছে।

লগতে পঢ়ক: সীতাৰ জন্মস্থানক লৈ আপত্তি, ‘আদিপুৰুষ’ নিষিদ্ধ কৰাৰ দাবী; প্ৰদৰ্শনী বাতিল নেপালত

আৱদ্ধ যাত্ৰীসকলক উদ্ধাৰ কৰিবলৈ অভিযান আৰম্ভ কৰিছে সেনাই। যুদ্ধকালীন পৰিস্থিতিৰে পথ মুকলিৰ কাম চলি আছে। কিন্তু নেৰানেপেৰা বৰষুণত এই কাম কৰিবলৈ যথেষ্ট আহুকালৰ সন্মুখীন হ’বলগীয়া হৈছে। ছিকিম প্ৰশাসনে পৰ্যটকক উত্তৰ ছিকিমৰ পৰা ওলাই যাবলৈ দিয়া নাই।

ছিকিমৰ কেইবাটাও অঞ্চলত পৰ্যটকৰ ভ্ৰমণৰ ওপৰত নিষেধাজ্ঞা আৰোপ কৰা হৈছে যদিও সকলো অঞ্চলতে নিষেধাজ্ঞা বলবৎ কৰা হোৱা নাই।

শেহতীয়াকৈ হিমস্খলনত ৭ জন পৰ্যটকৰ প্ৰাণ হেৰুৱাৰ পিছত তেওঁলোকৰ সুৰক্ষাক লৈ প্ৰশ্ন উত্থাপন হৈছিল। যোৱা মাহত পুনৰ ৪০ জন পৰ্যটক বৰফৰ ধুমুহাত আৱদ্ধ হৈ পৰিছিল। ভাৰতীয় সেনা আৰু সীমান্ত পথ অৰ্গেনাইজেশ্যনে (BRO) তেওঁলোকক উদ্ধাৰ কৰে।

লগতে পঢ়ক: মোডীয়ে এইবাৰ সলাই দিলে ‘নেহৰু মেমৰিয়েল মিউজিয়াম এণ্ড লাইব্ৰেৰী’ৰ নাম 

প্ৰাকৃতিক দুৰ্যোগত আৱদ্ধ হৈ থকা পৰ্যটকক উদ্ধাৰৰ বাবে এইবাৰ পঞ্চমবাৰৰ বাবে নামিছে সেনা আৰু বি আৰ অ’।