দাড়ি দীঘল নকৰি বিয়া পাতক; ৫৩ বছৰীয়া ৰাহুলক লালুৱে ক’লে, এতিয়াও সময় আছে

শুকুৰবাৰে বিহাৰৰ পাটনাত বিৰোধী মিত্ৰজোঁটৰ সৈতে এক গুৰুত্বপূৰ্ণ বৈঠকৰ অন্তত এখন সংবাদমেলত লালুপ্ৰসাদ যাদৱে প্ৰাক্তন কংগ্ৰেছ সাংসদ ৰাহুল গান্ধীক কয় যে এতিয়াও বিয়াৰ সময় পাৰ হোৱা নাই। কেবল দাড়ি দীঘল নকৰি সোনকালে বিয়াখন পাতক। যেতিয়াই মাতৃ ছোনিয়া গান্ধীক লগ পায় তেতিয়াই মাতৃ ছোনিয়া গান্ধীয়ে অভিযোগ কৰে যে ৰাহুলে একেবাৰে কথা শুনিব নিবিচাৰে। লালুহঁতেই যেন ৫৩ বছৰীয়া ৰাহুলক বিয়া পাতিবলৈ কয়। আন নেতাসকলে সেই কথা শুনি হাঁহি ৰখাব নোৱাৰিলে। ইফালে ৰাহুলকো কিবা এটা কোৱা দেখা গৈছিল। কিন্তু তেওঁ কি কৈছিল সেই কথা শুনা যোৱা নাছিল।

শুকুৰবাৰে পাটনাত কেইবাটাও বিৰোধী দলৰ নেতাই লোকসভা নিৰ্বাচনৰ কৌশল নিৰ্ধাৰণ কৰি মিত্ৰতাৰে বিজেপিৰ বিৰুদ্ধে যুঁজ দিয়াৰ বাবে এক বৈঠকত মিলিত হৈছিল। বিহাৰৰ মুখ্যমন্ত্ৰী তথা জেডিইউৰ মুৰব্বী নীতিশ কুমাৰ, আৰজেডিৰ লালু প্ৰসাদ যাদৱ, পশ্চিম বংগৰ মুখ্যমন্ত্ৰী আৰু তৃণমূল কংগ্ৰেছৰ মুৰব্বী মমতা বেনাৰ্জী, চিপিআইএমৰ সাধাৰণ সম্পাদক সীতাৰাম য়েচুৰী, কংগ্ৰেছৰ সভাপতি মল্লিকাৰ্জুন খৰ্গে, দিল্লীৰ মুখ্যমন্ত্ৰী আৰু আম আদম পাৰ্টিৰ মুৰব্বী অৰবিন্দ কেজৰিৱাল, তামিলনাডুৰ মুখ্যমন্ত্ৰী এম কে ষ্টেলিন, এন চি পিৰ মুৰব্বী শাৰদ পাৱাৰ, মহাৰাষ্ট্ৰৰ প্ৰাক্তন মুখ্যমন্ত্ৰী উদ্ধৱ থাকৰেকে ধৰি বিৰোধী দলৰ অন্যান্য নেতা উপ স্থিত থাকে।

সেই বৈঠকৰ শেষত বিৰোধী নেতাসকলে যৌথভাৱে এখন সংবাদমেল অনুষ্ঠিত কৰে। পাটনাৰ সেই সংবাদমেলতে লালুৱে ৰাহুলক বিয়াৰ পৰামৰ্শ দিয়ে। লালু সদায় এগৰাকী ধেমেলীয়া ৰাজনীতিবিদ হিচাপে পৰিচিত হৈ আহিছে। সংসদত ৰে’ল বাজেট দাখিল কৰাৰ সময়তো সেই সময়ৰ কেইবাটাও ভিডিঅ’ এতিয়াও ছ’চিয়েল মিডিয়াত অতি জনপ্ৰিয়। কেতিয়াবা হাঁহি বন্ধ কৰিব নোৱাৰা ধৰণৰ কথাবোৰ কৈছিল। শুকুৰবাৰেও ইয়াৰ ব্যতিক্ৰম নাছিল। লালুৰ কথা শুনি বিৰোধী নেতাসকলে হাঁহি বন্ধ কৰিব নোৱাৰিলে। সাংবাদিকসকলেও হাঁহিলে।

#WATCH | "You didn't listen to my advice earlier. You should have married. It is not too late even today. You must get married," says RJD leader Lalu Yadav to Rahul Gandhi during opposition leaders' press meet in Patna pic.twitter.com/T4HomIpZo5

— ANI (@ANI) June 23, 2023

অৱশ্যে এই ধেমালিৰ অন্তত ৰাহুলে অতি স্পষ্টভাৱে কয় যে অহা বছৰৰ লোকসভা নিৰ্বাচনত বিৰোধীয়ে একত্ৰিত হৈ বিজেপিৰ বিৰুদ্ধে যুঁজিব। কোন ৰাজ্যত কোনটো দলে যুঁজিব, কি অংক অনুসৰণ কৰি আগবাঢ়ি যোৱা হ’ব  সেই সবিশেষ আলোচনাৰ বাবে অহা মাহত হিমাচল প্ৰদেশৰ শিমলাত বিৰোধীয়ে এক বৈঠকত মিলিত হ’ব।