মুছলিমদ্ৰোহী অ’বামা! আক্ৰমণাত্মক সীতাৰমণৰ তীব্ৰ বাক্যশেল

ভাৰতত মুছলমান লোকৰ ওপৰত নিৰ্যাতনৰ অভিযোগ তুলি তীব্ৰ আক্ৰমণৰ বলি হ’বলগীয়া হৈছে প্ৰাক্তন আমেৰিকান ৰাষ্ট্ৰপতি বাৰাক অ’বামা। অসমৰ মুখ্যমন্ত্ৰী হিমন্ত বিশ্ব শৰ্মাৰ অ’বামা সন্দৰ্ভত বিতৰ্কিত মন্তব্যই বিশ্বজুৰি তোলপাৰ লগোৱাৰ সময়তে এইবাৰ প্ৰাক্তন ৰাষ্ট্ৰপতিগৰাকীক আক্ৰমণ কৰিছে কেন্দ্ৰীয় বিত্ত মন্ত্ৰী নিৰ্মলা সীতাৰমণে।

কেন্দ্ৰীয় মন্ত্ৰীগৰাকীয়ে প্ৰধানমন্ত্ৰী নৰেন্দ্ৰ মোদী তথা কেন্দ্ৰত শাসনাধিষ্ঠ বিজেপি চৰকাৰক দোষমুক্ত কৰি পৰোক্ষভাৱে অ’বামাকহে মুছলমান বিৰোধী ৰূপত প্ৰক্ষেপ কৰে। সীতাৰমণৰ মতে, নিজ কাৰ্যকালত ছয়খন মুছলমান সংখ্যাগৰিষ্ঠ ৰাষ্ট্ৰত বোমা বিস্ফোৰণ ঘটোৱা অ’বামাৰ অভিযোগক কোনেও বিশ্বাস নকৰে।

সীতাৰমণে কয় যে প্ৰধানমন্ত্ৰী মোদীয়ে তেওঁৰ চৰকাৰে কেনেদৰে ‘সবকা সাথ, সবকা বিকাশ’ নীতিৰ ওপৰত কাম কৰে আৰু কোনো সম্প্ৰদায়ৰ বিৰুদ্ধে বৈষম্য নকৰে, সেয়া আমেৰিকাত ইতিমধ্যেই উল্লেখ কৰিছে। গতিকে অ’বামাৰ অভিযোগত হতবাকহে হৈ পৰা বুলি মন্তব্য কৰে মন্ত্ৰীগৰাকীয়ে।

তেওঁ লগতে কয় যে, ভাৰতে আমেৰিকাৰ সৈতে বন্ধুত্বপূৰ্ণ সম্পৰ্ক বিচাৰে অথচ আমেৰিকাৰ পৰা ভাৰতত ধৰ্মীয় সহিষ্ণুতা সন্দৰ্ভত অভিযোগ উত্থাপন হয়।

ৰাষ্ট্ৰপতি হিচাপে যিগৰাকীৰ শাসনকালত ছয়খন মুছলমান সংখ্যাগৰিষ্ঠ দেশত ২৬,০০০ তকৈও অধিক বোমা বিস্ফোৰণ কৰা হৈছিল, মানুহে তেওঁৰ অভিযোগক কেনেকৈ বিশ্বাস কৰিব বুলি অ’বামাক কটাক্ষ কৰে সীতাৰমণে।

উল্লেখ্য যে, এক সাক্ষাৎকাৰত অ’বামাই প্ৰধানমন্ত্ৰী মোদীৰ আমেৰিকা ভ্ৰমণৰ সময়ত তেওঁৰ সৈতে যদি বাৰ্তালাপ কৰিলেহেঁতেন, তেতিয়া ভাৰতৰ মুছলমানসকলৰ অধিকাৰৰ বিষয়ে আলোচনা কৰিলেহেঁতেন বুলি মন্তব্য কৰিছিল।

অ’বামাৰ এই মন্তব্য সন্দৰ্ভত প্ৰতিক্ৰিয়া প্ৰকাশ কৰিবলৈ গৈ বিতৰ্কিত মন্তব্য কৰিছিল অসমৰ মুখ্যমন্ত্ৰী হিমন্ত বিশ্ব শৰ্মাই। হিমন্ত বিশ্ব শৰ্মাই মূলত: অ’বামাৰ ধৰ্মীয় পৰিচয়ক কটাক্ষ কৰি ভাৰততো বহুতো “হুছেইন অ’বামা” আছে আৰু আৰক্ষীয়ে এই হুছেইন অ’বামাৰ যত্ন লোৱাত অগ্ৰাধিকাৰ দিয়ে বুলি মন্তব্য কৰিছিল।