ৰাজপথৰ যুঁজৰ সামৰণি; এতিয়া কেৱল আদালতৰ যুঁজ: ঘোষণা প্ৰতিবাদী মল্লযুঁজাৰুৰ

ন্যায়ৰ দাবীত ৰাজপথত চলোৱা যুঁজৰ অৱসান ঘটালে দেশৰ তাৰকা মল্লযুঁজাৰুসকলে। এতিয়াৰ পৰা ৰাজপথৰ পৰিৱৰ্তে ন্যায় লাভৰ এই যুঁজ আদালতত চলাব বুলি প্ৰতিবাদী মল্লযুঁজাৰুসকলে ঘোষণা কৰিছে। বিগত পাঁচমাহ ধৰি ভাৰতীয় মল্লযুঁজ ফেডাৰেচনৰ মুৰব্বী ব্ৰিজ ভূষণ চৰণ সিঙৰ বিৰুদ্ধে মল্লযুঁজাৰুসকলে চলাই আছে এই যুঁজ।

তাৰকা মল্লযুঁজাৰু ক্ৰমে ৱিনেশ ফ’গাট, সাক্ষী মালিক আৰু বজৰং পুনিয়াই টুইট যোগে শাসকীয় বিজেপিৰ সাংসদ তথা ফেডাৰেচনৰ মুৰব্বী ব্রিজ ভূষণ শৰণ সিঙৰ বিৰুদ্ধে অভিযোগনামা দাখিল কৰাৰ প্রতিশ্রুতি চৰকাৰে পূৰণ কৰিছে বুলি উল্লেখ কৰি ৰাজপথৰ আন্দোলন অৱসান হোৱা বুলি ঘোষণা কৰে।

টুইটাৰত তেওঁলোকে লগতে কয় যে এই ক্ষেত্ৰত ন্যায় নোপোৱালৈকে মল্লযুঁজাৰুৰ প্ৰতিবাদ অব্যাহত থাকিব, কিন্তু এই যুঁজ এতিয়া কেৱল আদালতত হ’ব। লগতে তেওঁলোকে কয় যে, ডব্লিউ এফ আই- ৰ সংস্কাৰৰ সন্দৰ্ভত প্ৰতিশ্ৰুতি অনুসৰি নিৰ্বাচনী প্ৰক্ৰিয়া আৰম্ভ হৈছে।

১১ জুলাইৰ নিৰ্বাচন সন্দৰ্ভত চৰকাৰে দিয়া প্ৰতিশ্ৰুতি পূৰণৰ বাবে অপেক্ষা কৰিব বুলি মল্লযুঁজাৰুসকলে সদৰী কৰিছে। ইফালে এই বিবৃতি প্ৰকাশ কৰাৰ কেইমিনিটমান পিছতে ফ’গাট আৰু মালিকে আন এক টুইট যোগে তেওঁলোকে ছ’চিয়েল মিডিয়াৰ পৰা বিৰতি লৈছে বুলি জানিবলৈ দিয়ে।

উল্লেখ্য যে, একাংশ মহিলা মল্লযুঁজাৰুক যৌন নিৰ্যাতন চলোৱা বুলি ব্ৰিজ ভূষণৰ বিৰুদ্ধে অভিযোগ উত্থাপন কৰি মল্লযুঁজাৰুসকলে প্ৰতিবাদত নামিছিল যন্তৰ-মন্তৰত। দেশৰ নতুন সংসদ ভৱন উদ্বোধনৰ দিনা এই আন্দোলনে ধাৰণ কৰিছিল ব্যাপক ৰূপ। উক্ত দিনা ৰাজপথত পুলিচী নিৰ্যাতনৰ মুখামুখি হৈছিল দেশলৈ পদক অৰ্জনেৰে গৌৰৱ কঢ়িওৱা মল্লযুঁজাৰুসকল।

মল্লযুঁজাৰুসকলক চলোৱা নিৰ্যাতন আৰু তেওঁলোকক গ্ৰেপ্তাৰ কৰাৰ দৃশ্যই প্ৰতিক্ৰিয়াৰ সৃষ্টি কৰিছিল দেশৰ লগতে আন্ত:ৰাষ্ট্ৰীয় পৰ্যায়টো। নিন্দিত হৈছিল ভাৰতীয় মল্লযুঁজ ফেডাৰেচন। প্ৰতিবাদৰ সময়ত আনকি মল্লযুঁজাৰুসকলে দেশৰ হৈ অৰ্জন কৰা পদকসমূহ গংগাত বিসৰ্জন দিয়াৰ হুংকাৰো দিছিল।

ক্ৰমাৎ বৃদ্ধি পোৱা আন্দোলনৰ মাজতে ক্ৰীড়ামন্ত্ৰী অনুৰাগ ঠাকুৰে ১৫ জুনৰ ভিতৰত তদন্ত সমাপ্ত কৰিবলৈ সময়সীমা দিয়াৰ প্ৰতিশ্ৰুতি দিয়াৰ পিছত মল্লযুঁজাৰুসকলে নিজৰ প্ৰতিবাদ স্থগিত ৰাখিছিল।