মূল্যবৃদ্ধি নিয়ন্ত্ৰণত ব্যৰ্থ মোদী চৰকাৰে এইবাৰ বিক্ৰী কৰিব বিলাহী!

বিলাহী মূল্যবৃদ্ধিৰ জুইয়ে দহিছে মধ্যবিত্ত শ্ৰেণীক। সমগ্ৰ দেশতে অভাৱনীয় হাৰত বৃদ্ধি পাইছে বিহালীৰ মূল্য। কোনো কোনো ৰাজ্যত বিলাহীৰ মূল্য প্ৰতি কেজিত ১৫০ টকাৰ পৰা ২৫০ টকা পৰ্যন্ত হৈছে।

এনে পৰিস্থিতিত কেন্দ্ৰৰ গ্ৰাহক পৰিক্ৰমা বিভাগে উদ্যোগ লৈ জনসাধাৰণক সকাহ দিবলৈ লৈছে বিশেষ সিদ্ধান্ত। ৰাষ্ট্ৰীয় কৃষি সমবায় বিপণন ফেডাৰেচন আৰু ৰাষ্ট্ৰীয় সমবায় গ্ৰাহক ফেডাৰেচনক কৃষকৰ পৰা পোনপটীয়াকৈ বিলাহী ক্ৰয় কৰি দেশৰ যিবোৰ অঞ্চলত অধিক মূল্যত বিলাহী বিক্ৰী হৈ আছে তাত বিক্ৰী কৰিবলৈ নিৰ্দেশ দিছে।

অৰ্থাৎ মোডী চৰকাৰৰ মতে বজাৰত বিলাহীৰ যোগান বৃদ্ধি হ’লেই বিলাহীৰ দাম হ্ৰাস পাব।

সমগ্ৰ দেশতে বিলাহীৰ খেতি হয় যদিও কেইবাখনমান ৰাজ্যত অধিক হাৰত বিলাহীৰ উৎপাদন হয়। ইয়াৰ ভিতৰত আছে অন্ধ্ৰ প্ৰদেশ, কৰ্ণাটক আৰু মহাৰাষ্ট্ৰ।

কেন্দ্ৰৰ গ্ৰাহক পৰিক্ৰমা বিভাগে সেই তিনিখন ৰাজ্যৰ পৰা বিলাহী ক্ৰয় কৰাৰ সিদ্ধান্ত লৈছে। সূত্ৰ অনুসৰি অহা শুকুৰবাৰৰ পৰা মোডী চৰকাৰে দিল্লী-এনচিআৰত বিলাহী বিক্ৰী কৰিব। ইফালে বিলাহীৰ দাম বৃদ্ধি অনুযায়ী কেন্দ্ৰৰ সংশ্লিষ্ট বিভাগে এখন তালিকা প্ৰস্তুত কৰিছে আৰু সেই সেই অঞ্চলত চৰকাৰে বিলাহী বিক্ৰী কৰিব।

উল্লেখ্য যে দেশৰ প্ৰায় ৬০ শতাংশ বিলাহী উৎপাদন মূলতঃ দক্ষিণ আৰু পশ্চিম ৰাজ্যত হয়। তাৰ পৰা উদ্বৃত্ত সামগ্ৰী যাতে ভাৰতৰ অন্য প্ৰান্তলৈ যোগান ধৰা হয়। বিশেষজ্ঞসকলে কয় যে দেশৰ বিভিন্ন প্ৰান্তত বিলাহী উৎপাদনৰ বতৰ একে নহয়। দাম বৃদ্ধিৰ কাৰণ হিচাপে পৰিবহণৰ সময়ত ফচলৰ ক্ষতি আৰু উষ্ণ জলবায়ু বুলি কোৱা হৈছে।

বৰ্তমান গুজৰাট, মধ্যপ্ৰদেশ, মহাৰাষ্ট্ৰ আৰু অন্ধ্ৰপ্ৰদেশৰ পৰা বিলাহী যোগান ধৰা হৈছে। দিল্লী আৰু ইয়াৰ আশে-পাশে থকা অঞ্চলত উপলব্ধ বিলাহী হিমাচল প্ৰদেশ আৰু কৰ্ণাটকত উৎপাদন কৰা হয়।

প্ৰসংগক্ৰমে বাৰিষাৰ আৰম্ভণিতে শাক-পাচলিৰ দাম বৃদ্ধি পাইছে। কিন্তু বিলাহীৰ দাম অধিক হাৰত বৃদ্ধি পাইছে। খুচুৰা বজাৰত বিলাহীৰ মূল্য ১৫০ টকাৰ পৰা ২৫০ টকালৈকে বৃদ্ধি পাইছে। পাইকাৰী বজাৰত বিলাহী ৮০-১০০ টকাৰ হাৰত বিক্ৰী কৰা হৈছে। বৰ্তমান দেশৰ বিভিন্ন বজাৰত প্ৰতি কেজি বিলাহীৰ দাম ১৪০-১৬০ টকা।  

এতিয়া প্ৰশ্ন হৈছে, কেন্দ্ৰৰ এই পদক্ষেপৰ দ্বাৰা মধ্যবিত্ত শ্ৰেণী সঁচাই লাভৱান হ’ব নে?