দুদিনীয়া কাৰ্যসূচীৰে কোকৰাঝাৰত আৰম্ভ হৈছে বৈশাগু-বৰদৈ চিখলা উৎসৱ

কোকৰাঝাৰ চহৰৰ বডোফা নগৰত থকা বিটিচি সচিবালয় চৌহদত শনিবাৰৰ পৰা আৰম্ভ হৈছে দুদিনীয়া বৰ্ণাঢ্য কাৰ্যসূচীৰে বৈশাগু বৰদৈ চিখলা উৎসৱ।  বিটিচি প্ৰশাসনৰ উদ্যোগত উদযাপিত বৈশাগু বৰদৈ চিখলা উৎসৱৰ প্ৰথম দিনৰ কাৰ্যসূচী অনুসৰি বিভিন্ন প্ৰান্তৰ পৰা অহা বিহু, বৈশাগু নৃত্যৰ প্ৰতিযোগিতা আয়োজিত কৰা হয়৷

অসমৰ ভূমিপুত্ৰ বড়ো জনগোষ্ঠীৰ ডেকা-গাভৰুসকলে জাতীয় সাজ-পাৰ পিন্ধি বৈশাগু নৃত্য, অসমীয়াৰ বিহু নৃত্য, ৰাভা, গাড়ো , মিচিং আদি জনগোষ্ঠীৰ লোকসকলে নিজ নিজ জাতীয় সাজ-পাৰ পিন্ধি নৃত্য প্ৰতিযোগিতাত অংশ গ্ৰহণ কৰে।

বড়োসকলৰ খাম, ছিফুং, ঢোল, পেঁপা, গগণা আদি বাদ্যযন্ত্ৰ বজাই বিহু, বৈশাগুৰ গীতৰ তালে-তালে ককাঁল ভাঙি হেপাঁহ পুলৱাই নাচি উপস্থিত ৰাইজক আপ্লুত কৰি তোলে।

অনুষ্ঠানত অংশগ্ৰহণ কৰি বিটিচিৰ কাৰ্যবাহী সদস্য দনেশ্বৰ গয়াৰীয়ে বিভিন্ন জাতি জনগোষ্ঠীক লৈ বিটিচি প্ৰশাসনৰ উদ্যোগত বৈশাগু বাৰদৈ চিখলা উৎসৱৰ জৰিয়তে শান্তি, একতা আৰু সাংস্কৃতিক সমন্বয়ৰ বাৰ্তা যাব বুলি সংবাদ মাধ্যমৰ আগত প্ৰকাশ কৰে।

আজি অন্তিম দিনৰ সাংস্কৃতিক অনুষ্ঠান মুকলি কৰিব বড়ো সাহিত্য সভাৰ সভাপিত তৰেন বড়োৱে। তদুপৰি,  অসম সাহিত্য সভাৰ সভাপতিৰ পৰমানন্দ ৰাজবংশী আৰু আছুৰ মুখ্য উপদেষ্টা সমূজ্জল ভট্টাচাৰ্যই ক্ৰমে মুখ্য অতিথি আৰু আমন্ত্ৰিত অতিথি হিচাপে অংশগ্ৰহণ কৰিব।