সুৰাৰ ৰাগী: শ্ৰেণীকোঠাত শিক্ষাৰ্থীৰ সন্মুখতে নগ্ন হৈ শুই পৰিল প্ৰধান শিক্ষক

শ্ৰেণীকোঠাত শিক্ষাগ্ৰহণৰ উদ্দেশ্যে আসনত বহি থকা অৱস্থাত শিক্ষাৰ্থী আৰু সন্মুখন নিজ আসনত শিক্ষক। পিছে শিক্ষাদান কৰিব পৰাকৈ সক্ষম অৱস্থাতহে নাই শিক্ষকগৰাকী। তাৰ পৰিৱৰ্তে সুৰাৰ ৰাগীত মাতাল শিক্ষকগৰাকী শিক্ষাৰ্থীৰ সমুখতে শুই আছে নগ্ন অৱস্থাত!

এই আজৱ ঘটনা সংঘটিত হৈছে উত্তৰ প্ৰদেশত। ৰাজ্যখনৰ বাহৰাইচৰ এখন চৰকাৰী প্ৰাথমিক বিদ্যালয়ৰ প্ৰধান শিক্ষকৰ বিৰুদ্ধে উত্থাপিত হৈছে এই চাঞ্চল্যকৰ অভিযোগ। কেৱল সিমানেই নহয়, ছাত্ৰ-ছাত্ৰীৰ সন্মুখত তেওঁ অশ্লীল কাৰ্যত লিপ্ত হোৱাৰ অভিযোগো উঠিছে।

ইতিমধ্যে এই গুৰুতৰ অভিযোগৰ বাবে প্ৰধান প্ৰধানগৰাকীক নিলম্বন কৰা হৈছে বুলি সদৰী কৰিছে বিভাগীয় এগৰাকী বিষয়াই। এই চাঞ্চল্যকৰ ঘটনাৰ এক ভিডিঅ’ও সম্প্ৰতি ভাইৰেল হৈ পৰিছে।

অভিযুক্ত প্ৰধান শিক্ষকগৰাকীক বিশেশ্বৰগঞ্জ ব্লকৰ শিৱপুৰ বাইৰাগি প্ৰাথমিক বিদ্যালয় দুৰ্গা প্ৰসাদ জয়ছোৱাল বুলি চিনাক্ত কৰা হৈছে। অৱশ্যে ভাইৰেল হোৱা ভিডিঅ’টোৰ সত্যতা এতিয়াও নিৰ্ণয় কৰিব পৰা হোৱা নাই বুলি বিভাগে লগতে উল্লেখ কৰে।

ইফালে এই ঘটনাত উত্তেজিত হৈ পৰা অভিভাৱক আৰু স্থানীয় গাঁওবাসীয়ে দুৰ্গা জয়ছোৱালে ছাত্ৰ-ছাত্ৰীৰ সন্মুখতে প্ৰায়ে এইদৰে অশ্লীল কাৰ্য্ত লিপ্ত হয় বুলি দাবী কৰিছে। এই অশালীন কাৰ্যৰ বাবে বহু শিক্ষাৰ্থীয়ে বিদ্যালয়লৈ যোৱা বন্ধ কৰি দিছে বুলি তেওঁলোকে লগতে কয়।

এই বিস্ফোৰক অভিযোগৰ পিছতে শিক্ষা বিভাগে তদন্তৰ নিৰ্দেশ দিয়ে আৰু দুৰ্গা জয়ছোৱালক নিলম্বন কৰে। বিভাগীয় তদন্ত সম্পূৰ্ণ হোৱাৰ পিছত যদি প্ৰধান শিক্ষকগৰাকী দোষী সাব্যস্ত হয়, তেওঁৰ বিৰুদ্ধে এফ আই আৰ দাখিল কৰা হ’ব বুলিও বিভাগে উল্লেখ কৰে।