উচ্চ ন্যায়ালয়ৰ স্থানান্তকৰণ সিদ্ধান্তৰ তীব্ৰ বিৰোধিতা আপ অসমৰ

গুৱাহাটী উচ্চ ন্যায়ালয়ৰ স্থানান্তকৰণৰ বিৰোধিতাৰে অধিবক্তা সমাজে চলাই থকা প্ৰতিবাদলৈ সমৰ্থন আগবঢ়াইছে আম আদমি পাৰ্টীৰ অসম শাখাই। বৰ্তমানৰ স্থানৰ পৰা উত্তৰ গুৱাহাটীলৈ উচ্চ ন্যায়ালয়ৰ স্থানান্তৰৰ বাবে ৰাজ্য চৰকাৰে গ্ৰহণ কৰা সিদ্ধান্তৰ বিৰোধিতা কৰিছে আপে।

এক বিবৃতিযোগে আম আদমি পাৰ্টীৰ ৰাজ্যিক সভাপতি ডা৹ ভবেন চৌধুৰীয়ে কয় যে ১৯৪৮ চনতে স্থাপন কৰা ঐতিহ্যমণ্ডিত উচ্চ ন্যায়ালয়খনৰ লগত জড়িত হৈ আছে অসমৰ জনতা আৰু অধিবক্তা সমাজৰ আবেগ।

এই আবেগক আওকাণ কৰি মুখ্যমন্ত্ৰী হিমন্ত বিশ্ব শৰ্মাই অধিবক্তা সমাজৰ লগত কোনো আলোচনা নকৰাকৈ চূড়ান্ত মইমতালিৰে উচ্চ ন্যায়ালয়খন উত্তৰ গুৱাহাটীৰ ৰংমহল নামৰ স্থানলৈ স্থানান্তৰিত কৰিব বিচৰাৰ আঁৰত কি স্বাৰ্থ জড়িত হৈ আছে বুলি প্ৰশ্ন উত্থাপন কৰে আম আদমি পাৰ্টীয়ে।

আপৰ মতে, বৰ্তমানৰ ঐতিহ্যমণ্ডিত স্থানৰ পৰা উচ্চ ন্যায়ালয়খন গুৱাহাটী কাষৰীয়া অঞ্চললৈ লৈ গ’লে ন্যায়ালয়ত কৰ্মৰত অধিবক্তাসকলৰ যাতায়াতৰ ক্ষেত্ৰত ভীষণ অসুবিধাৰ সন্মুখীন হোৱাৰ বিপৰীতে ৰংমহলত ইতিমধ্যে মাটি ক্ৰয় কৰি থোৱা একাংশ ধনিক শ্ৰেণী লাভান্বিত হ’ব।

“এতিয়া প্ৰশ্ন হয়, জীৱনত একমাত্ৰ মাটি-সম্পত্তিকে গোটোৱা তথা সমাজ জীৱনলৈ কোনো ধৰণৰ বৰঙনি আগ নবঢ়োৱা ধনিক শ্ৰেণীটোৰ লগত হিমন্ত বিশ্ব শৰ্মা থাকিব নে অধিবক্তা সমাজৰ লগত থাকিব?”- এইদৰে প্ৰশ্ন কৰে আপে।

এই বিবৃতিযোগে উচ্চ ন্যায়ালয়ৰ অধিবক্তা সমাজৰ লগত আম আদমি পাৰ্টীৰ সহযোগিতা থাকিব বুলি ঘোষণা কৰে অসম ৰাজ্যিক সমিতিৰ সভাপতি গৰাকীয়ে।