ইতিহাসৰ আটাইতকৈ ভয়াৱহ প্ৰাকৃতিক দুৰ্যোগ; বনজুইয়ে ধ্বংস কৰি পেলালে আমেৰিকাৰ হাৱাই!

আমেৰিকা যুক্তৰাষ্ট্ৰৰ হাৱাই ৰাজ্যৰ মাউই কাউন্টিত বনজুইৰ ফলত ব্যাপক ক্ষতিসাধন হৈছে। এই অগ্নিকাণ্ডক আমেৰিকাৰ অংগৰাজ্যখনৰ ইতিহাসৰ আটাইতকৈ ভয়াৱহ প্ৰাকৃতিক দুৰ্যোগ বুলি কোৱা হৈছে।

এই পৰ্যন্ত এই অগ্নিকাণ্ডত বহু লোকৰ মৃত্যু হোৱা বুলি নিশ্চিত হৈছে। কৰ্তৃপক্ষই জনোৱা মতে, মৃত্যুৰ সংখ্যা আৰু বৃদ্ধি পাব পাৰে। শ শ লোক এতিয়াও সন্ধানহীন হৈ আছে। কৰ্তৃপক্ষই অনুসন্ধান অভিযান অব্যাহত ৰাখিছে।

যোৱা মঙলবাৰে সংঘটিত হয় এই অগ্নিকাণ্ড বিয়পি পৰাৰ ঘটনা। কিন্তু তাৰ আগতে বতৰ বিজ্ঞান বিভাগে কোনো বিশেষ সতৰ্কবাণী দিয়া নাছিল।

বিষয়াসকলে জনোৱা মতে, আমেৰিকাৰ মাউই দ্বীপত সংঘটিত হোৱা বনজুইৰ ফলত মৃত্যু হোৱা লোকৰ সংখ্যা নিশ্চিত হৈছে ৯৩ জন। কিন্তু শ শ লোক এতিয়াও সন্ধানহীন হৈ আছে আৰু হাৱাইৰ গৱৰ্ণৰ জোছ গ্ৰীনে কয় যে মৃত্যুৰ সংখ্যা বৃদ্ধি পাব পাৰে। তেওঁ কয় যে আৰু বহু নিহত লোকৰ মৃতদেহ চিনাক্তকৰণৰ বাবে অপেক্ষা কৰি আছে।

মাউইৰ ঐতিহাসিক চহৰ লাহাইনাৰ এটা বৃহৎ অংশ সম্পূৰ্ণৰূপে ধ্বংস হয় এই অগ্নিকাণ্ডত। অগ্নিনিৰ্বাপক বাহিনীয়ে জনোৱা মতে, এই চহৰকে ধৰি কেইবাটাও অঞ্চলত অগ্নিকাণ্ড নিয়ন্ত্ৰণ কৰা হৈছে।

লাহাইনাৰ পৰা খালী কৰা বাসিন্দাসকলে কয় যে তেওঁলোকৰ কিছুমান ঘৰত লুটপাত কৰা হৈছে যদিও আৰক্ষীয়ে সেই কথা নিশ্চিত কৰা নাই।

মাউই দ্বীপৰ পশ্চিম দিশত বনজুইৰ বলি হোৱা লোকৰ সন্ধানত এতিয়াও অনুসন্ধানকাৰী দলে অভিযান চলাই আছে। ফেডাৰেল বিষয়া জেৰেমি গ্ৰীণউডে কয় যে এতিয়াও প্ৰায় ১০০০ লোকৰ সৈতে যোগাযোগ কৰিব পৰা হোৱা নাই যদিও তেওঁলোকৰ হয়তো বহুতেই নিৰাপদে আছে।

ক’ষ্ট গাৰ্ডে জনোৱা মতে, চহৰখনৰ বন্দৰ অঞ্চলৰ পানীৰ পৰা ১৭ জন লোকক জীৱন্তে উদ্ধাৰ কৰা তেওঁলোকে জুইৰ পৰা হাত সাৰিবলৈ সাগৰত জপিয়াই পৰিছিল।

জীৱিত আৰু স্থানচ্যুত লোকৰ বাবে মুকলি কৰা হৈছে ছটা আশ্ৰয় শিবিৰ। বিষয়াসকলে কয় যে তেওঁলোকে পৰ্যটকসকলক হোটেল আৰু ক্ষতিগ্ৰস্ত লোকসকলক ভাড়াঘৰত ৰখাৰ পৰিকল্পনা কৰিছে।

হাৱাইৰ এই দ্বীপটোত আমেৰিকাৰ বহু ধনী লোকে বাস কৰে, য’ত আমাজনৰ প্ৰতিষ্ঠাপক জেফ বেজোছও ​​আছে। ইতিমধ্যে তেওঁ আৰু তেওঁৰ সংগী লৰেন ছানচেজে বনজুইৰ বলি হোৱা লোকসকলক ১০ কোটি ডলাৰ অনুদান আগবঢ়োৱাৰ কথা ঘোষণা কৰিছে।

যোৱা মঙলবাৰৰ পৰা আৰম্ভ হোৱা এই অগ্নিকাণ্ড পিছত হাৰিকেন ড’ৰাৰ ফলত সৃষ্টি হোৱা প্ৰচণ্ড বতাহত ব্যাপকভাৱে বিয়পি পৰে।

ইয়াৰ পিছত কৰ্তৃপক্ষই তাৰ পৰা প্ৰায় ১৪ হাজাৰ পৰ্যটকক উলিয়াই আনে। কিন্তু বিদ্যুৎ আৰু ইণ্টাৰনেট যোগাযোগ ব্যৱস্থা বিকল হোৱাৰ বাবে এতিয়াও বহু লোকক বিচাৰি পোৱা নাই কৰ্তৃপক্ষই।

মাউই দ্বীপৰ কৰ্তৃপক্ষই জনোৱা মতে, বনজুইৰ ফলত হোৱা ব্যাপক ক্ষতিৰ পৰা হাত সাৰিবলৈ বহু বছৰ আৰু শ শ কোটি ডলাৰৰ প্ৰয়োজন হ’ব। গৱৰ্ণৰ গ্ৰীনে কয় যে এইটো সম্ভৱতঃ হাৱাই ৰাজ্যৰ ইতিহাসৰ আটাইতকৈ ডাঙৰ প্ৰাকৃতিক দুৰ্যোগ।

গ্ৰীনে প্ৰকাশ কৰা এটা ভিডিঅ’ত দেখা গৈছে যে ঘৰবোৰ জুইৰ লেলিহান শিখাই আগুৰি ধৰিছে। তাতে তেওঁ কৈছে যে কমেও ১০০০ ঘৰ ধ্বংস হৈছে।

ইফালে, মাউই বন বিভাগে জনোৱা মতে, মঙলবাৰৰ পৰা বনাঞ্চলৰ একাধিক স্থানত বনজুইত শ শ একৰ বনভূমি জ্বলি গৈছে।