চলন্ত ৰে’লত হত্যালীলা চলোৱা চেতন সিঙক বৰ্খাস্ত: পূৰ্বেও চলিছিল তিনিটাকৈ অনুশাসনমূলক তদন্ত

যোৱা মাহত এখন চলন্ত ৰে’লত নৃশংসভাৱে এগৰাকী জ্যেষ্ঠ আৰ পি এফ বিষয়া আৰু তিনিগৰাকী যাত্ৰীক গুলীয়াই হত্যা কৰা আৰ পি এফৰ কনিষ্টবল চেতন সিঙক সেৱাৰ পৰা বৰ্খাস্ত কৰা হৈছে।

ৰে’ল সুৰক্ষা বাহিনীৰ জ্যেষ্ঠ সংমণ্ডল নিৰাপত্তা আয়ুক্তই সোমবাৰে সিঙক বৰ্খাস্ত কৰাৰ নিৰ্দেশ জাৰি কৰিছে বুলি জানিব পৰা গৈছে।

ইফালে এই নৃশংস হত্যালীলা চলোৱা চেতন সিং পূৰ্বেও তিনিটা অনুশাসন সম্পৰ্কীয় তদন্তৰ সন্মুখীন হৈছিল বুলি জানিবলৈ দিছে বিভাগীয় এগৰাকী শীৰ্ষ বিষয়াই।

উল্লেখ্য যে, যোৱা ৩১ জুলাইৰ পুৱাৰ ভাগত জয়পুৰ-মুম্বাই চেণ্ট্ৰেল ছুপাৰফাষ্ট এক্সপ্ৰেছত জ্যেষ্ঠ বিষয়া টিকাৰম মীনাৰ লগতে তিনিগৰাকী যাত্ৰীক গুলীয়াই হত্যা কৰাৰ অভিযোগ উত্থাপন হৈছিল সিঙৰ বিৰুদ্ধে।

নিহত তিনিগৰাকী যাত্ৰীক আব্দুল কদৰ মহম্মদ হুছেইন ভানপুৰৱালা, ছায়াদ ছৈফুদ্দিন আৰু আছগৰ আব্বাছ শ্বেইখ বুলি চিনাক্ত কৰা হৈছিল।

তিনিওগৰাকী যাত্ৰী ৰে’লখনৰ পৃথক পৃথক ডবাত যাত্ৰা কৰিছিল।এই হত্যাকাণ্ডৰ পিছতে সিঙক ৰে’ল আৰক্ষীয়ে গ্ৰেপ্তাৰ কৰিছিল।

লক্ষণীয়ভাৱে এই জঘন্য হত্যাকাণ্ডৰ আঁৰৰ উদ্দেশ্য এতিয়াও স্পষ্ট হোৱা নাই যদিও হত্যাকাণ্ডৰ পূৰ্বে সিঙে প্ৰধানমন্ত্ৰী মোদী আৰু উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ সমৰ্থনত কথা কোৱা বুলি বাতৰি প্ৰকাশ পাইছিল।

সিঙে প্ৰথমে নিজৰ অটোমেটিক চাৰ্ভিচ অস্ত্ৰৰে আৰ পি এফৰ সহকাৰী উপ-পৰিদৰ্শক মীনা আৰু বি ৫ ডবাত থকা এগৰাকী যাত্ৰীক গুলীয়াই হত্যা কৰে।

ইয়াৰ পিছতে তেওঁ ৰে’লখন ‘পেণ্ট্ৰি কাৰ’ত থকা এগৰাকী যাত্ৰী আৰু এছ ৬ ডবাত থকা আন এজন যাত্ৰীক গুলীয়াই হত্যা কৰে। হত্যাকাণ্ড সংঘটিত কৰি সিঙে পলায়নৰো চেষ্টা চলায়।

অৱশ্যে ৰে’লৱে আৰক্ষীয়ে সিঙক কৰায়ত্ব কৰিবলৈ সক্ষম হয় আৰু লগে লগে গ্ৰেপ্তাৰ কৰে। ঘটনাৰ সোধা-পোচাৰ বাবে ধৃত চেতন সিঙক সম্প্ৰতি ন্যায়িক জিম্মাত ৰখা হৈছে।