বিহাৰত চাঞ্চল্য: ঘৰৰ ভিতৰতে সাংবাদিকক গুলীয়াই হত্যা

এক চিনেমাসদৃশ হত্যাকাণ্ডই জোকাৰি তুলিছে বিহাৰ। এগৰাকী সাংবাদিকক বন্দুকধাৰী আততায়ীয়ে ঘৰৰ ভিতৰতে গুলীয়াই হত্যা কৰাক লৈ ৰাজ্যখনত তীব্ৰ চাঞ্চল্যৰ সৃষ্টি হৈছে। নিহত সাংবাদিকগৰাকীৰ নাম বিমল যাদৱ বুলি জানিব পৰা গৈছে।

প্ৰকাশিত খবৰ অনুসৰি, পুৱা প্ৰায় ৫:৩০ বজাত বিমল যাদৱৰ ঘৰৰ দুৱাৰত কোনো অচিনাক্ত লোকে টুকুৰিয়াই দুৱাৰ খুলিবলৈ কয় আৰু দুৱাৰ খোলাৰ পাছতে চাৰি বন্দুকধাৰী আততায়ীয়ে উপৰ্যুপৰি গুলীচালনাৰে তেওঁক হত্যা কৰে।

ৰাণীগঞ্জ বজাৰ এলেকাত সংঘটিত হৈছে এই ঘটনা। হত্যাৰ বলি হোৱা ৩৫ বছৰীয়া বিমল যাদৱে দৈনিক জাগৰণ কাকতত স্থানীয় সাংবাদিক হিচাপে কাম কৰিছিল।

ঘটনাৰ পিছতে আৰক্ষীৰ দল ঘটনাস্থলীত উপস্থিত হয় আৰু যাদৱৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰে বুলি আৰক্ষীয়ে জানিবলৈ দিয়ে। আৰক্ষীয়ে লগতে প্ৰাথমিক তথ্য-প্ৰমাণ সংগ্ৰহৰ বাবে ঘটনাস্থলীত ফফৰেনছিকদল উপস্থিত হয় বুলিও সদৰী কৰে।

ইফালে এই হত্যাকাণ্ডই বিহাৰৰ ৰাজনৈতিক জগত উত্তাল কৰি তুলিছে। বিৰোধীয়ে এই হত্যাকাণ্ডৰ বাবে ৰাজ্যৰ নীতিশ কুমাৰ নেতৃত্বাধীন চৰকাৰক দোষাৰোপ কৰিছে। ৰাজ্য চৰকাৰক আইন-শৃংখলা ৰক্ষাত সম্পূৰ্ণ ব্যৰ্থ বুলি দাবী কৰিছে বিৰোধী নেতা চিৰাগ পাছৱানে।

অৱশ্যে সমগ্ৰ ঘটনাক লৈ মুখ্যমন্ত্ৰী নীতিশ কুমাৰে শোক প্ৰকাশ কৰে। নীতিশ কুমাৰে এই ঘটনাক অত্যন্ত দুখজনক বুলি অভিহিত কৰি ঘটনাৰ বিষয়ে অৱগত হোৱাৰ পিছতে তৎকালীনভাৱে তদন্তৰ নিৰ্দেশ দিয়ে বুলি উল্লেখ কৰে।

আৰক্ষীৰ তথ্য অনুসৰি, এই সন্দৰ্ভত দুগৰাকী লোকৰ বিৰুদ্ধে এফআইআৰ দাখিল কৰা হৈছে। অৱশ্যে এতিয়ালৈকে কোনো অভিযুক্তক গ্ৰেপ্তাৰ কৰা হোৱা নাই আৰু তেওঁলোকৰ সন্ধানত অভিযান অব্যাহত আছে বুলি আৰক্ষীয়ে সদৰী কৰিছে।

বিমল যাদৱৰ এই নৃশংস হত্যাৰ প্ৰকৃত কাৰণ এইপৰ্যন্ত জানিব পৰা হোৱা নাই যদিও প্ৰাথমিক তদন্তৰ পৰা তেওঁৰ ওচৰ-চুবুৰীয়াৰ সৈতে পুৰণি শত্ৰুতাই এই কাণ্ডৰ কাৰণ হ’ব পাৰে বুলি অনুমান কৰা হৈছে।

লক্ষণীয়ভাৱে, ২০১৯ চনত সাংবাদিকগৰাকীৰ ভাতৃক হত্যা কৰা হৈছিল। সেই ঘটনাৰ অন্যতম প্ৰধান সাক্ষী আছিল বিমল যাদৱ। বিমল যাদৱৰ হত্যাকাণ্ড উক্ত গোচৰৰ সৈতে জড়িত বুলিও সন্দেহ কৰা হৈছে।