এইবাৰ ভুৱা গৃহ মন্ত্ৰালয়ৰ বিষয়া! ভুৱা পৰিচয়েৰে সৰকালে কোটি টকা

চন্দ্ৰযান ৩ ৰ সফলতাৰ পিছত শেহতীয়াকৈ গুজৰাটৰ এগৰাকী ব্যক্তিয়ে নিজকে চন্দ্ৰযান-৩ৰ মডেমৰ ডিজাইনাৰৰ ভুৱা পৰিচয় দি গ্ৰেপ্তাৰ হোৱা ঘটনা ব্যাপক চৰ্চিত হৈছিল। ইয়াৰ পূৰ্বেও চৰকাৰী বিষয়াৰ ভুৱা পৰিচয়েৰে গ্ৰেপ্তাৰ হৈছে বহুকেইজন লোক।

এইবাৰ কেন্দ্ৰীয় তদন্ত সংস্থা এনফৰ্চমেণ্ট ডাইৰেক্টৰেট আৰু গৃহ পৰিক্ৰমা মন্ত্ৰালয়ৰ বিষয়াৰ পৰিচয়েৰে প্ৰতাৰণা কৰাৰ অভিযোগত ধন সৰবৰাহৰ প্ৰতিৰোধ আইনৰ বিধানৰ অধীনত এগৰাকী ব্যক্তিক গ্ৰেপ্তাৰ কৰিছে এনফৰ্চমেণ্ট ডাইৰেক্টৰেটে।

তদন্তকাৰী সংস্থাটোৱে প্ৰকাশ কৰা অনুসৰি অভিযুক্তৰ নাম ওমবীৰ সিং। বুধবাৰে সিঙক গ্ৰেপ্তাৰ কৰাৰ পিছত অহা ২ ছেপ্টেম্বৰলৈকে আহমেদাবাদৰ এখন আদালতে তেওঁক ইডিৰ জিম্মালৈ প্ৰেৰণ কৰিছে।

আহমেদাবাদ আৰক্ষী আৰু চুৰাট আৰক্ষীয়ে ওমবীৰ সিঙৰ বিৰুদ্ধে পঞ্জীয়ন কৰা এফআইআৰৰ ভিত্তিত এনফৰ্চমেণ্ট ডাইৰেক্টৰেটে তদন্ত আৰম্ভ কৰে।

ইডিৰ মতে, ওমবীৰ সিঙে নিজকে ইডিৰ জ্যেষ্ঠ বিষয়া বুলি পৰিচয় দি নিবিদাৰ কাম সম্পন্ন কৰাৰ অজুহাতত এগৰাকী কয়লা ব্যৱসায়ীৰ পৰা প্ৰতাৰণাৰে ১.৫০ কোটি টকাৰ সৰকাই নিয়ে।

তদুপৰি সিঙে ভাৰত চৰকাৰৰ গৃহ পৰিক্ৰমা মন্ত্ৰালয়ৰ বিত্তীয় উপদেষ্টা আৰু অডিটৰৰ বেশ ধৰি চুৰাটস্থিত শক্তি খণ্ডৰ কোম্পানী এটাক ২ কোটিতকৈ অধিক ধনৰ প্ৰতাৰণা কৰে বুলি ইডিয়ে সদৰী কৰিছে।

ইডিৰ তদন্তত প্ৰকাশ পোৱা মতে, নিৰ্মাণ স্থানৰ তত্বাৱধায়ক হিচাপে ২০১৯ চনলৈকে ওমবীৰ সিঙে কাৰ্যনিৰ্বাহ কৰিছিল। কিন্তু ইয়াৰ পিছত তেওঁ বিভিন্ন বিভাগত কৰ্মৰত চৰকাৰী জ্যেষ্ঠ বিষয়াৰ বেশ ল’বলৈ ধৰিলে।

এনে ভুৱা পৰিচয়েৰে বিভিন্ন ক্ষেত্ৰৰ লোকক তেওঁ কাম সম্পূৰ্ণ কৰি দিয়াৰ অজুহাতেৰে সাক্ষাৎ কৰে আৰু এইদৰে এনে লোক তথা প্ৰতিষ্ঠানৰ পৰা কোটি কোটি টকাৰ প্ৰতাৰণা কৰিছে। বিষয়টোৰ অধিক তদন্ত অব্যাহত আছে বুলি ইডিয়ে লগতে জানিবলৈ দিয়ে।